Tags-Sahil

tum sar-e-sāhil Dubo baiThe ho 'mohsin' kashtiyāñ
jin safīnoñ ko samundar paar honā thā hue

saare sāhil saare sāgar us kī haiñ mīrās
jis ke paañv zamīñ par Thahreñ bahte paanī meñ

jazīre aur sāhil sab zamāne ke liye rakkhe
mirā saarā ilāqa us ne zer-e-āb rakkhā hai

khule ahvāl-e-dil jab nāsehoñ par
tah-e-dariyā agar sāhil se badle

dekhā ḳhudā pe chhoḌ ke kashtī ko nāḳhudā
jaise ḳhud aa gayā koī sāhil liye hue

kabhī to aa.egā sāhil tirī rifāqat kā
abhī maiñ baiThā huuñ kashtī meñ bad-gumānī kī

miTTī thī ḳhafā mauj uThā le ga.ī ham ko
girdāb meñ sāhil kī balā le ga.ī ham ko

bhañvar ne jin ko lā pheñkā thā is be-rahm sāhil par
havā.eñ aaj phir un kashtiyoñ ke bādbāñ kholeñ

jahāñ the muttafiq sab apne begāne Dubone ko
usī sāhil pe aaj apnī anā kī sīpiyāñ roleñ

un ke dar tak pahuñch ke martā huuñ
Dūbtā huuñ qarīb sāhil ke

na detā gar sahārā kuchh umīd-e-vasl kā tūfāñ
shanāvar bahr-e-ġham kā hasrat-e-sāhil meñ rah jaatā

kahte haiñ unhīñ ko dushman-e-dil hai naam unhīñ kā nāseh bhī
vo log jo rah kar sāhil par mañjdhār kī bāteñ karte haiñ

maiñ us se samundar hī koī māñgtā lekin
Dar thā vo kahīñ phir koī sāhil na banā de

'shamīm' us ne sāhil pe mujh ko Duboyā
jo Duube huoñ ko ubhārā kare hai

sailāb-e-zindagī ke sahāre baḌhe chalo
sāhil pe rahne vāloñ kā nām-o-nishāñ nahīñ

tum badan kī sat.h ke tairāk banñā chāhte the
tum the nazzāroñ ke sāhil par tamāsha-bīn aur shauqīn

sab tire zer-e-nagīñ mauj samundar sāhil
bādbāñ terā tirī naav talātum terā

vo jo tūfāñ ko safīna kabhī sāhil samjhe
yūrish-e-qatra-e-shabnam se ḳhafā kyā hoñge

bhañvar kā kaam jazīre ko varġhalānā thā
dhuāñ dhuāñ lab-e-sāhil parind ojhal hai

mauj-e-ḳhuddār agar hai to sū-e-ġhair na dekh
kisī tūfāñ kisī sāhil kā bharosā bhī na kar