Tags-Saqi

hosh ko fursat-e-ehsās kahāñ baaqī thī
aañkh chaltī rahī saaqī kī har ik jaam ke saath

kam nahīñ milk-e-sulemāñ se visāl-e-sāqī
gardish-e-jām mujhe halqa-e-ḳhātam ho jaa.e

tarz-e-sāqī se dair ke sab log
kar rahe haiñ ḳhudā ḳhudā baiThe

us mast ke haiñ gesūoñ ke silsile meñ ham
saaqī murīd jis kā hai pīr-e-muġhāñ talak

tere ta.iiñ to lāzim thā tauba kā sabab pūchhe
mai-kashī se ai saaqī go ki ham qasam khaa.ī

bāb-e-sāqī pe ilāhī mirā sūraj Duube
shaam hote hī jahāñ jaam baTā karte haiñ

sāqī-garī kī laaj rakho ye to ehtimām
koī bhī riñd bazm meñ pyāsā na chāhiye

saaqī kī ik nigāh pe mad.hosh bazm hai
gardish meñ ab to sāġhar-o-mīnā na chāhiye

kyā dikhā.eñ ḳhushk lab do buuñd ke saaqī haiñ sab
pyaas sahrā-e-azal us ko samundar chāhiye

aisā bhī kyā itaab ki saaqī bachī-kuchhī
āḳhir meñ kuchh bhī ham ko ināyat na ho sakī

aañkh se piine kā bhī saaqī ne māñgā hai hisāb
is ravish se yaaro koī mai-kada hotā nahīñ

aaj kyuuñ haath tire kaañp rahe haiñ saaqī
dekh to ḳhuun ġharīboñ kā tah-e-jām na ho

khole ye shīshoñ ke muñh saaqī ne aaj
bazm meñ tirte haiñ kyā pyāle paḌe

ye bhī hai maarā huā saaqī kī chashm-e-nāz kā
is liye 'ādil' ko shīshe kī parī achchhī lagī

chāñdnī hai raat hai ḳhalvat hai sehn-e-bāġh hai
jaam bhar saaqī ki ye qismat se haath aa.ī hai raat

agar girya-kunāñ sarshār-e-ulfat huuñ to ai saaqī
unhīñ ke āñsuoñ se bāda-e-gulnār ho paidā

ḳhudā ke haath hai biknā na biknā mai kā ai saaqī
barābar masjid-e-jāme ke ham ne ab dukāñ rakh dī

mai-ḳhāne meñ daur chale maiñ ik ik buuñd ko tarsā huuñ
saaqī bhī hai merī nazar meñ shīsha kyā paimāna kyā

kyuuñ na chhake dil dekh ke us ko jis saaqī kā hove yaaro
dast-e-nigārīñ panja-e-marjāñ sā.ad-e-sīmīñ gardan-e-mīnā

saaqī na.e charāġh mubārak tujhe magar
jo bujh chuke haiñ un kā bayāñ kuchh na kuchh to ho