Tags-Saqi

koī badmast ko detā hai saaqī bhar ke paimāna
tirā kyā jā.egā mujh par abas ilzām aa.egā

isī ummīd meñ bāñdhe hue haiñ TakTakī mai-kash
kaf-e-nāzuk pe saaqī rakh ke ik din jaam aa.egā

use bhī Thaan rakh saaqī yaqīñ hogā na rindoñ ko
agar zāhid pahan kar jāma-e-ehrām aa.egā

kahāñ se lā.ūñ sabr-e-hazrat-e-ayyūb ai saaqī
ḳhum aa.egā surāhī aa.egī tab jaam aa.egā

nañg-o-nāmūs se ab guzro javānoñ kī tarah
par fishānī karo aur saaqī se ibrām karo

piitā huuñ ghūñT ghūñT meñ sāñsoñ ke saath saath
saaqī kā aur umr kā paimāna ek hai

daur-e-nigāh-e-sāqī-e-mastāna ek hai
paimāne do haiñ gardish-e-paimāna ek hai

laboñ tak mere baḌh ke ḳhud hī aa pahuñchā hai ai saaqī
nazar bhar kar kabhī maiñ ne jo sū-e-jām dekhā hai

hai koī aisā jo saaqī se kahe mere liye
ye bhī ik allāh kā banda tirī mahfil meñ hai

har qadam par mujhe laġhzish kā gumāñ hotā hai
chashm-e-sāqī kī navāzish kā gumāñ hotā hai

vafā ke haiñ ḳhvān par nivāle ze-a.āb avval do.am ba-ātish
bhare hai saaqī yahāñ pyāle ze-āb avval do.am ba-ātish

mujh ko to ḳhūn-e-dil hī piinā hai
dast-e-sāqī meñ gar hai jaam to kyā

saaqī nigāh-e-nāz se lillāh kaam le
sau jaam pī chukā huuñ magar be-ḳhudī nahīñ

saaqī tirā mai-ḳhāna rahe hashr tak ābād
bhar jaatā hai kashkol-e-gadāyāna hamārā

malāl ye hai ki saaqī to ban ga.e sāhab
sharāb haath meñ hai aur pilā nahīñ sakte

na jaane kah diyā kis be-ḳhudī meñ saaqī ne
surūr-e-tishna-labī hai sharāb kī mānind

shikva-ba-lab vo riñd haiñ saaqī aaj bhī tere maiḳhāne meñ
tishna-dahan baiThe haiñ lekin arz-e-talab bebāk nahīñ hai

maze meñ rañg meñ tezī meñ saaqī
mai-e-tasnīm kyā phīkī paḌī hai

nafas mauj-e-muhīt-e-be-ḳhudī hai
taġhāful-hā-e-sāqī kā gila kyā

taqlīd ab maiñ hazrat-e-vā.iz kī kyuuñ karūñ
saaqī ne de diyā mujhe fatvā javāz kā