Tags-Saqi

nirāle haiñ yahī duniyā meñ tauba toḌne vaale
udhar saaqī 'riyāz' aa.e idhar jām-e-sharāb aayā

huā bint-e-inab se aqd is pīrāna-sālī meñ
mubārak ho mujhe saaqī buḌhāpe meñ shabāb aayā

bazm-e-sāqī meñ tahī-dastī ne kho dī aabrū
baḳht-e-bad apnā sharīk-e-gardish-e-paimāna thā

naubat auroñ kī to ai saaqī subū-pardāz hai
kyā machā.ī hai hamāre ek paimāne meñ dhuum

maiñ is ke sivā kuchh nahīñ kahtā mire saaqī
'shārib' tirī mahfil se pashemān uThā hai

itnā bhī na saaqī hosh rahā pī kar ye hameñ mai-ḳhāna thā
gardish meñ hamārī qismat thī chakkar meñ tirā paimāna thā

vaa.iz ne jo farmāyā thā mehrāb-e-haram meñ
rindoñ se vo kyuuñ sāqi-e-mai-ḳhāna kahā jaa.e

jām-e-sharāb kā maiñ kaahe ko multajī huuñ
āñkhoñ ko terī saaqī paimāna jāntā huuñ

aks-e-ruḳh saaqī ko gar dekh luuñ sāġhar meñ
kuchh dil ke bahalne kī sūrat nazar aa jaa.e

gar yaad meñ saaqī kī sāġhar nazar aa jaa.e
paimāna-e-dil chhalke muñh ko jigar aa jaa.e

saaqī siyāh-ḳhāna-e-hastī meñ dekhnā
raushan charāġh kis ne sar-e-shām kar diyā

TuuTe hue paimāne bekār sahī lekin
mai-ḳhāne se ai saaqī bāhar to na pheñkā kar

maiñ daurān-e-sar se jo sar phoḌtā huuñ
na mai hai na saaqī na jām-e-subū hai

aise meñ vo hoñ baaġh ho saaqī ho ai 'qamar'
lag jaa.eñ chaar chāñd shab-e-māhtāb meñ

aa.ī bahār daur ho saaqī sharāb kā
dariyā bahā de bazm meñ ashk-e-kabāb kā

saaqī tirī mahfil ko rañgīn kiyā jis ne
vo ḳhuun hai taqve kā yā jalva-e-mīnā hai

rū-e-sāqī matla-e-nūr-e-sharāb
āftāb aamad dalīl-e-āftāb

sarshār ho ke jā chuke yārān-e-mai-kada
saaqī hamāre naam kā sāġhar bhī aa.egā

sāqī-o-vā.iz meñ zid hai bāda-kash chakkar meñ hai
tū ba-lab pur aur lab Duubā huā sāġhar meñ hai

ik raat uḌaa.ī na mirī duḳhtar-e-raz se
saaqī ne bat-e-mai ko bhī surḳhāb banāyā