Tags-Satire

zarīf abrū ġhazab ġhamza ġhussa ġhaur ġhazal
ghamanD qaus qazā ishq tanz niim saḳhī

ye tanz yuuñ bhī hai ik imtihān mere liye
tire laboñ se koī aur muskurāyā hai

pheñkā thā maiñ ne tanz kā patthar kisī kī samt
'ġhālib' kī tarah apnā hī sar yaad aa gayā

aaj to ham ko pāgal kah lo patthar pheñko tanz karo
ishq kī baazī khel nahīñ hai kheloge to hāroge

ġhā.eb huī bijlī to huī fikr kī lo tez
logoñ ne usī vaqt kyā tanz ko mahmez

aap ke tanz sar āñkhoñ pe magar yaad rahe
ye vo nashtar haiñ ke siine meñ utar jaate haiñ

hamīñ meñ kyuuñ hadaf-e-tanz ai jamāl-e-bahār
sabhī ne phuul chune the tirī qabā ke liye

mujh ko mat chhūnā ki ris kar phūTne vaalā huuñ maiñ
tujh ko kyā ma.alūm tere tanz kā chhālā huuñ maiñ

vo tabassum meñ nihāñ tanz ke mīThe nashtar
vo takallum meñ taġhāful ko chhupāne kī adā

apne dukhoñ pe tanz koī khel to na thā
zaḳhmoñ ko phuul kah ga.e ham vaz.a-dār log

har tanz kiyā jaa.e har ik ta.ana diyā jaa.e
kuchh bhī ho par ab hadd-e-adab meñ na rahā jaa.e

merī tar-dāmanī-e-chashm pe yuuñ tanz na kar
maiñ sadaf huuñ tū mirā dil hai guhar kī sūrat

...apne ahd kī saffākī par ye ḳhāmoshī tanz nahīñ
koī to hogā is kā sabab kyuuñ baiThe ho dil-gīr likho

sho.aloñ meñ nikharte haiñ jauhar qismat pe 'farīdī' tanz na kar
ġham aisī hī ne.amat hai jis ko paate haiñ yahāñ qismat ke dhanī

ab tanz pe kyuuñ majbūr karo ham ġhair mulavvis logoñ ko
fan pesh karo ye fahrist-e-asmā-e-girāmī rahne do

tanz kī sard havā.eñ jo satātī haiñ mujhe
shiddat-e-garmī-e-ehsās ko pī letā huuñ

dariyā pe ek tanz samajhiye ki tishnagī
sāhil kī sard ret meñ dafnā ga.ī mujhe

vo dushmanoñ ke tanz ko Thukrā ke pī ga.e
maiñ dostoñ ke ġhaiz ko bhaḌkā ke pī gayā

kaliyāñ khilā rahī thī shoḳhī nasīm-āsā
jab tanz ban ga.ī hai talvār ho ga.ī hai

tanz dushnām lānat adāvat hasad
in rafīqoñ kā saaya rahā aur maiñ