Tags-Sayyad

ḳhushī ho ho ke ḳhud sayyād kahtā hai anādil se
bahār aa.ī huī hai chahchahā.e jis kā jī chāhe

asiir kar ke hameñ ḳhush na hoiyo sayyād
ki tū bhī yaañ to giraftār-e-dām-e-hastī hai

qafas meñ aaj tamāshā-e-ġham hai qābil-e-dīd
taḌap rahā huuñ maiñ sayyād kī ḳhushī ke liye

thā giraftār-e-shab-o-roz nigahbānī meñ
ham jo ab chhūTeñ haiñ sayyād rihā hotā hai

chhoḌā jo murda jaan ke sayyād ne mujhe
kyūñkar uḌā maiñ ho ke rihā kuchh na pūchhiye

kar chukā qaid se jis vaqt ki āzād mujhe
haath maltā hī rahā dekh ke sayyād mujhe

sahn-e-gulshan meñ mire phuul kareñge gulchīñ
ro.egā suunā qafas dekh ke sayyād mujhe

itnā hairāñ ho mirī be-talabī ke aage
vā qafas meñ koī dar ḳhud mirā sayyād kare

yaar sayyād bāġhbāñ kā huā
ye nayā aur ik bañdhā khaTkā

mujrim the jo ham so qaid hue sayyād magar ab ye to batā
har vaqt ye kis ko DhūñDte haiñ dīvār ke saa.e zindāñ meñ

ye tamīz allāh de sayyād ko
baaġh vīrāñ ho qafas ābād ho

jo adū-e-bāġh ho barbād ho
koī ho gulchīñ ho yā sayyād ho

maiñ vo bulbul huuñ jise dono haiñ ek
baaġh ho yā ḳhāna-e-sayyād ho

murġh-e-be-bāl-o-par huuñ ai sayyād
aarzū hai kisī rihā.ī kī

sab chaman vāloñ ne to luuTī bahār
aur mujhe sayyād hī kā Dar rahā

ishq-e-pechāñ kā chaman meñ jaal phailā dekh kar
bulbuloñ ko sarv par dhokā huā sayyād kā

par katar de are sayyād chhurī phernā kyā
maar Dālegī yūñhī hasrat-e-parvāz mujhe

hai mauj-e-vaqt qafas aur zindagī sayyād
maiñ lamha lamha habāboñ meñ qaid rahtā huuñ

khīñch kar le chal mujhe shauq-e-asīrī sū-e-dām
kaam aisā kar ki jis se jī baḌhe sayyād kā

māna-e-fariyād hai kuchh tab.a kī afsurdagī
kuchh sukūt-āmoz hai pās-e-adab sayyād kā