Tags-Sayyad

kuchh to ham sabr o razā bhuul ga.e haiñ shāyad
aur kuchh zulm bhī sayyād bahut kartā hai

tire asiir jo sayyād karte haiñ fariyād
to phir vo dam hī nahīñ zer-e-dām lete haiñ

sayyād ne jo kaaT diye bāl-o-par tamām
fariyād aaj karte haiñ us bāġhbāñ se ham

khol chashm-e-lutf de jāgīr maqsūd-e-'sirāj'
sham.a-rū parvāna-dil sayyād par baaqī rahā

fasl-e-gul kā ġham dil-e-nāshād par baaqī rahā
hashr lag ye muzlima sayyād par baaqī rahā

ye said-gāh-e-ishq hai Thahrā.iye nigāh
sayyād-e-muztarib se na hogā shikār dil

sā.ateñ be-sabātī kī aulād haiñ aur sayyād haiñ is liye aao ham
vaqt ko toḌ deñ varna sab kaam kī rāteñ Dhal jā.eñgī din guzar jā.eñge

ḳhud bhī sayyād imtihān meñ hai
ek hī tiir ab kamān meñ hai

ḳhaas vaqt-e-yād-e-gulshan aur merā chheḌnā
shab ko bhī sayyād mere zab.h se ġhāfil na thā

andalībān-e-chaman ko sayyād
fasl-e-gul meñ na satānā hargiz

sayyād jab qafas se nikālā thā bahr-e-zab.h
pūchhī to hotī murġh-e-giraftār kī havas

be-bāl-o-parī khotī hai tauqīr-e-asīrī
sayyād yahāñ le ke kabhī daam na aayā

are sayyād hamīñ gul haiñ hamīñ bulbul haiñ
tū ne kuchh aah sunā bhī nahīñ dekhā bhī nahīñ

na to sayyād kā khaTkā na ḳhizāñ kā dhaḌkā
ham ko vo chain qafas meñ hai ki bustāñ meñ nahīñ

andalīb-e-ḳhush-navā par aañkh hai sayyād kī
nargis-e-shahlā sarāpā intizār-e-naġhma hai

hai tunuk-mizāj sayyād kuchh apnā bas nahīñ hai
maiñ qafas ko le ke uḌtā agar iḳhtiyār hotā

zabt kartā huuñ to ghuTtā hai qafas meñ mirā dam
aah kartā huuñ to sayyād ḳhafā hotā hai

shaġhl-e-sayyād yahī sub.h o masā hotā hai
qaid hotā hai koī koī rihā hotā hai

use ma.alūm hai mere paroñ meñ dam nahīñ hai
mirā sayyād ab mujh se baġhāvat chāhtā hai

ho mujh sā andalīb ḳhush-ilhān asīr-e-dām
sayyād kā nasīb merā āb-o-dāna thā