Tags-Sayyad

ab is chaman meñ na sayyād hai na hai gulchīñ
karo to ab sitam-e-bāġhbāñ kī baat karo

taḌpe bahut pa jānib-e-sayyād āḳhirash
qullāb-e-ishq kī kashisheñ ham ko lā.iyāñ

us kā dil misl-e-qafas aur vo sayyād-sifat
jaane kab qaid se āzād karegī mujh ko

hamārī laash gulistāñ meñ dafn kar sayyād
chaman se duur koī nauha-ḳhvāñ rahe na rahe

ab ke baras dastūr-e-sitam meñ kyā kyā baab īzād hue
jo qātil the maqtūl hue jo said the ab sayyād hue

kam-baḳht marne ke liye sayyād ke ghar aa.e haiñ
dekheñge ab kyā sair-e-gul chhuT kar asīrān-e-qafas

kaaT kar par bhī mujhe sayyād be-qābū na chhoḌ
nā-tavāñ huuñ baad kā jhokā uḌā le jā.egā

gulshan meñ kaun bulbul-e-nālāñ ko de panāh
gulchīñ o bāġhbāñ bhī haiñ sayyād kī taraf

chashm-e-sayyād pe har lahza nazar rakhtā hai
haa.e vo said jo kahne ko tah-e-dām nahīñ

ik parinda bhī nahīñ peḌ pe baaqī 'gulzār'
tiir sayyād ne kis vaqt kamāñ meñ rakkhā

mirī zabān ko kāñTā samajhtā hai sayyād
nikāl le ki na ye ho na guftugū aa.e

maiñ huuñ sayyād hai aur shor-o-fuġhān-o-faryād koī detā nahīñ daad
ham-safīrān-e-chaman rā ki rasānd ḳhabre az man-e-nauha-gare

phañs ga.e daam meñ sayyād ke shāyad bulbul roz suntā huuñ ye ġhul
ham-safīrān-e-chaman rā ki rasānd ḳhabre az man-e-nauha-gare

uḌ ga.ī par se tāqat-e-parvāz
kahīñ sayyād ab rihā na kare

sayyād o bāġhbāñ meñ bahut hotī hai salāh
aisā na ho kahīñ gul o bulbul meñ jañg ho

phaḌkūñ to sar phaTe hai na phaḌkūñ to jī ghaTe
tañg is qadar diyā mujhe sayyād ne qafas

bas kisī kā nahīñ sayyād ḳhatā kyā terī
āb-o-dāna mirī qismat kā gulistāñ meñ nahīñ

ye ḳhvāb hai sayyād kā yā ik dil-e-vahshī
ubhrā hai koī tā.ir-e-chālāk nazar meñ

achchhā ye karam ham pe to sayyād kare hai
par noch ke ab qaid se āzād kare hai

qafas se chhoḌe hai ab mujh ko kyā tū ai sayyād
chaman ke biich kahāñ mausam-e-bahār rahā