Tags-Sayyad

sayyād shādmāñ hai magar ye to soch le
maiñ aa gayā ki saaya tah-e-dām aa gayā

qaid-e-sayyād meñ jab se huuñ chaman yaad nahīñ
dost haiñ ahl-e-qafas ahl-e-vatan yaad nahīñ

mausam-e-gul nahīñ paiġhām-e-ajal thā sayyād
dekh ḳhālī hai qafas aaj giraftāroñ se

yahī do-chār tinke āshiyāñ ke
milā sayyād ko is ke sivā kyā

ne tiir kamāñ meñ hai na sayyād kamīñ meñ
goshe meñ qafas ke mujhe ārām bahut hai

qafas meñ ab kahāñ vo imbisāt-e-sub.h-e-āzādī
chaman tak lutf thā sayyād merī ḳhush-navā.ī kā

be-vaj.h kiyā qaid asīroñ ko qafas meñ
sayyād ke sar phir bhī to ilzām nahīñ hai

jaate haiñ ham-safīr chaman ko par ek maiñ
yaañ kushta-e-taġhāful-e-sayyād rah gayā

sayyād ko kabhī na musībat ne dī najāt
bulbul ke sabr meñ ye giraftār hī rahā

gulzār meñ hamesha kiye ham ne chahchahe
sayyād o bāġhbāñ ko sadā ḳhaar hī rahā

machhlī ne Dhiil paa.ī hai luqme pe shaad hai
sayyād mutma.in hai ki kāñTā nigal ga.ī

abas sayyād ko hai bad-gumānī
nahīñ baazū meñ apne ek par tak

jāhil bhī haiñ suqrāt-e-sanad-zād bhī haiñ
said-tā-fitrāk bhī sayyād bhī haiñ

dushmanī mujh se kiye jā magar apnā ban kar
jaan le le mirī sayyād magar pyaar ke saath

haiñ qafas meñ jab se ham us sañg-dil sayyād ke
ashk hī letā hai merā āb-o-dāne kī ḳhabar

kuchh bhī na ab kaheñge qafas meñ zabāñ se ham
sayyād ko rulā.enge āh-o-fuġhāñ se ham

itne mānūs the sayyād se jaate na kahīñ
qaid meñ par na parindoñ ke katarnā thā miyāñ

na ab sayyād kā khaTkā na ab gulchīñ kā andesha
karam ne bāġhbāñ ke phūñk Daalā mere gulshan ko

taa.ir ke liye dushvār nahīñ sayyād-o-qafas se duur rahe
lekin jo shakl-e-nasheman hai us daam se bachnā mushkil hai