Tags-Sayyad

ho mujh sā andalīb ḳhush-ilhān asīr-e-dām
sayyād kā nasīb merā āb-o-dāna thā

lohe ke the chane tire chhīñTe ġhazab ke thī
sayyād ḳhuub apne liye āb-o-dāna thā

kunj-e-qafas meñ shikva-e-sayyād kyā karūñ
us kā qusūr kyā hai merā āb-o-dāna thā

ḳhatar-pasand tabī.at ko sāzgār nahīñ
vo gulsitāñ ki jahāñ ghaat meñ na ho sayyād

par to katre haiñ yaqīn hai ki chhurī bhī phere
zamzamoñ se mire sayyād hai hil hil jaatā

jis roz se ki shauq-e-asīrī huā mujhe
sayyād hai shikār-e-anādil se dil uchāT

kis tarah naala kare bulbul chaman kī yaad meñ
ghis ga.ī us kī zabāñ to shikva-e-sayyād meñ

bichh jā.eñge bulbul aa ke hazāroñ TuuT paḌeñge ja.al ye hai
sayyād gulābī pahne hai kapḌe chādar-e-gul hai daam nahīñ

kar ke āzād har ik shahpar-e-bulbul katrā
aaj sayyād ne ek aur nayā gul katrā

ab hai āvāz kī vo shaan na baazū kī uḌaan
aur sayyād kiye detā hai āzād mujhe

umr sayyād kī guzrī isī jāsūsī meñ
gul ko naama na kare murġh-e-giraftār-e-ravāñ

zabt kā yaarā nahīñ sayyād kā bhī hai ḳhayāl
nāla-e-dil-soz ko naġhma banānā hī paḌā

mujh ko fasl-e-gul meñ tevar dekh kar sayyād ke
āshiyāna chhoḌ kar gulshan se jaanā hī paḌā

shikva na daam kā hai na sayyād kā gila
ham aap ho ga.e haiñ giraftār kyā kaheñ

mad.h-e-sayyād bahar-hāl zarūrī to nahīñ
chup raho ye bhī hai ab jur.at-e-kirdār kī baat

us ke dar par to kisī kī bhī rasā.ī na huī
le ke sayyād qafas ko jo idhar se guzrā

paroñ ko khol de zālim jo band kartā hai
qafas ko le ke maiñ uḌ jā.ūñgā kahāñ sayyād

sayyād o bāġhbāñ ke tevar batā rahe haiñ
ye log fasl-e-gul ke kapḌe utaar leñge

hameñ to aarzū ye thī qafas ko toḌ Daalo tum
magar tum ne kiyā vo hī jo sab sayyād karte haiñ