Tags-Sayyad

qafas hī ab nasheman hai qafas hī sahn-e-gulshan hai
asīroñ se kaho kyuuñ minnat-e-sayyād karte haiñ

zamāne se nirālā hai karam sayyād-o-gulchīñ kā
jalā kar āshiyāñ kahte haiñ ab āzād karte haiñ

tabāhī par hamārī shikva-e-sayyād karte haiñ
chaman meñ haiñ kuchh aise bhī jo ham ko yaad karte haiñ

phañse sayyād ke phande meñ be-tarah
hamārī ab rihā.ī ho chukī bas

hañsā chaman meñ jo dil dekh sūrat-e-sayyād
ye murġh daane se aur daam se nahīñ vāqif

tujh ko ai sayyād kāvish hī agar manzūr hai
tū chaman meñ chhoḌ de mujh ko mire par toḌ kar

kuchh to sayyād ne kuchh bād-e-sabā ne luuTā
āshiyāne kā ajab rañg nazar aatā hai

tū chhoḌ ab to asīr-e-qafas ko ai sayyād
kalī chaTakne lagī mausam-e-gulāb aayā

sayyād ko ma.alūm na thā raaz ye shāyad
ye ruuh qafas meñ bhī to āzād rahegī

āshiyāñ jal gayā, gulsitāñ luT gayā, ham qafas se nikal kar kidhar jā.eñge
itne mānūs sayyād se ho ga.e, ab rihā.ī milegī to mar jā.eñge

zabāñ se hamārī hai sayyād ḳhush
hameñ ab ummīd-e-rihā.ī nahīñ

hameñ qaid karne se kyā naf.a sayyād
na the daam meñ ham to laane ke qābil

ek maiñ hī thā jo sayyād kī jholī meñ girā
uḌ ga.e saare parinde jo chaman tak pahuñche

na ham qafas meñ ruke misl-e-bū-e-gul sayyād
na ham misāl-e-sabā halqa-e-rasan meñ rahe

dī rihā.ī mujhe sayyād ne ai vaa.e nasīb
daḳhl jab fasl-e-ḳhizāñ kā huā gulzāroñ meñ

achchhā ye karam ham pe tū sayyād kare hai
par noch ke ab qaid se āzād kare hai

sayyād ko jhiñjhoḌ rihā.ī isī meñ hai
tauq-e-ġhulāmī toḌ rihā.ī isī meñ hai

sayyād ne tasallī-e-bulbul ke vāste
kunj-e-qafas meñ hauz bharā hai gulāb kā

ye nahīñ kahtā ki sayyād ab mujhe āzād kar
do ghaḌī ko bahr-e-gul-gasht-e-gulistāñ chhoḌ de