Tags-Shaam

rañj hai hālat-e-safar hāl-e-qayām rañj hai
sub.h-ba-sub.h rañj hai shām-ba-shām rañj hai

nigāh-e-lutf se terī kahīñ jo ham milte
hamārī ziist ke shām-o-sahar baham milte

kis ke lahhū meñ shaam nahā kar hai surḳh-rū
kis ne chukā.ī ḳhuun se qīmat ġhurūr kī

tū urūs-e-shām-e-ḳhayāl bhī to jamāl-e-rū-e-e-sahar bhī hai
ye zarūr hai ki ba-īñ hama mirā ehtimām-e-nazar bhī hai

ġhamoñ kī shaam hai be-shak magar udaas na ho
ba-shakl-e-shām payām-e-sahr bhī aatā hai

mahñgī thī is qadar tire jalvoñ kī raushnī
ham apnī ek shaam firozāñ na kar sake

ġhuncha-o-gul kī ḳhasta-hālī kā
zikr meñ sub.h-o-shām kartā huuñ

hamārī ghaḌiyoñ pe shaam hone meñ pāñch bajne meñ din paḌe the
so ham ko chhuTTī se pahle ḳhud ko kisī lahad meñ utārnā thā

shām-e-ġham aaj bhī guzrī hai hasīñ ḳhvāboñ meñ
ġham-e-jānāñ to mohabbat meñ sitam Dhā.egā

charāġh āñkhoñ meñ jal rahe the
sukūt shām-e-malāl tak thā

yaad kartā huuñ us ko saarā din
aur sar-e-shām bhuul jaatā huuñ

maiñ shaam kī balā.eñ luuñ yā bosa sub.h kā
bikhre paḌe haiñ raat ke donoñ kināre ḳhvāb

sāqiyā ek nazar jaam se pahle pahle
ham ko jaanā hai kahīñ shaam se pahle pahle

ai kam-nazar na sarsarī nazar se dekh tū ki ham
sahar kā ujlā nuur haiñ shafaq meñ lipTī shaam haiñ

mātam kī āvāz uThā.ī zanjīroñ ke halqoñ ne
haath bañdhe the gardan se par girya shām-tā-madyan thā

ḳhulūs-e-dil kā sila soz aarzū kā guhar
isī guhar 'farīdī' charāġh-e-shām kareñ

ye achchhe log haiñ jab shaam hotī hai
to be-āvāz galiyoñ ke sahāre

havā ke vāste ik kaam chhoḌ aayā huuñ
diyā jalā ke sar-e-shām chhoḌ aayā huuñ

zulf o ruḳhsār kā manzar tauba
shaam aur sub.h kī yakjā.ī hai

sukūt-e-shām-e-alam tū hī kuchh batā ki tujhe
kahāñ pe ḳhvāb kahāñ rat-jagā banānā hai