Tags-Shaam

din to hañgāma-e-hastī meñ guzar jā.egā
sub.h tak shaam ko afsāna-dar-afsāna karo

huā jo sar-e-shām dil paash paash
kiyā tār-e-ġham se rafū raat bhar

tujhe raushnī se judā karūñ kisī shaam maiñ
tujhe itnī taab meñ dekhnā nahīñ ho rahā

din ke sahrā meñ bahut der se shaam aatī hai
us se milne kī duā shaam se vābasta hai

zikr jis kā sahar-o-shām se vābasta hai
raushnī zehn kī us naam se vābasta hai

shām-e-furqat intihā-e-gardish-e-ayyām hai
jitnī sub.heñ ho chukī haiñ aaj sab kī shaam hai

ye zo.af hai ki pahuñche hai tā-sub.h ruḳh talak
gar zulf par nigāh sar-e-shām kījiye

vo ja.ad-e-mushkīñ jo din ko dekhe to yaad us kī meñ shaam hī se
ye pech-o-tāb aa ke dil se uljhe ki phir sahar tak na suljhe shab se

is tarah shaam ke saa.e phaile
raat kā pichhlā pahar yaad aayā

vo nazar ban ga.ī paiġhām-e-hayāt
halqa-e-shām-o-sahar yaad aayā

har har nafas chhurī hai liye qat-e-shām-e-hijr
yā aaj dam nikal hī gayā yā sahar huī

kiyā maiñ ne jab kisī ke ruḳh-o-zulf se kinārā
kabhī sub.h ne sadā dī kabhī shaam ne pukārā

tarab-āfrīñ hai kitnā sar-e-shām ye nazārā
tire hoñT par shafaq hai mirī aañkh meñ sitārā

dard kī dhuup meñ sahrā kī tarah saath rahe
shaam aa.ī to lipaT kar hameñ dīvār kiyā

kyā shām-o-sahar us kī hai kyā us ke shab-o-roz
duniyā ko bhī jo kākul-o-ruḳhsār hī samjhe

hai duur abhī 'riyāz' manzil
din ḳhatm hai shaam ho ga.ī hai

qaabū meñ hai un ke vasl kā din
jab aa.e haiñ shaam ho ga.ī hai

na chāhtā vo to raushan na hotī koī bhī shai
hai nuur us kā bhī kyā shām-e-intizār meñ kuchh

guhar thā maah thā jugnū thā yā sitāra-e-shām
chamak rahā thā tirī chashm-e-ashk-bār meñ kuchh

din ko hotī hai jo logoñ ke guzarne kī jagah
shaam ke ba.ad vahāñ merā makāñ hotā hai