Tags-Shaam

girā na aañkh se aañsū fareb-e-qismat par
sukūn jis se ho vo iztirāb paidā kar

jahāñ lamha-e-shām bikher diyā
vahīñ ik paiġhām bikher diyā

jaan se jaane se pahle ik aah bharī hogī tū ne
shaam Dhale jo duur kahīñ ab vīrānoñ meñ gūñjtī hai

aatī hai sukūt-e-sahar-o-shām kī āvāz
dar-asl to ham naql-e-makānī ke liye haiñ

jal chuke chashm-e-a.izzā meñ charāġh
so bhī jā 'mullā' ki vaqt-e-shām hai

shāyad kisī kī yaad kā mausam phir aa gayā
pahlū meñ dil kī tarah dhaḌakne lagī hai shaam

apne liye in chāñd sitāroñ ko sar-e-shām
is shāḳh-e-tamāshā meñ pironā hī bahut hai

aaj kyā be-ufuq rahegī shaam
be-sitāra safar rahegā kiyā

tumheñ jab kabhī mileñ fursateñ mire dil se bojh utaar do
maiñ bahut dinoñ se udaas huuñ mujhe koī shaam udhār do

kabhī puurā din isī ḳhaak par mire saath rah
isī kunj meñ koī shaam kar kaf-e-kūza-gar

kisī sub.h mujh ko vajūd de mire rū-ba-rū
kisī shaam mujh se kalām kar kaf-e-kūza-gar

tere milne kī ḳhushī tere bichhaḌne kā malāl
ġhamza-e-shām-o-sahar ne hameñ jiine na diyā

aur phir shaam huii, rañg uḌe, jaam bane
aur phir zikr chhiḌā, thoḌe se ġhamnāk hue

kahtī hai ye shaam kī narm havā phir mahkegī is ghar kī fazā
nayā kamra sajā na.ī sham.a jalā tire chāhne vaale aur bhī haiñ

mire dil kī ḳhud ye majāl thī ki vo shām-e-ġham ko sahar kare
tirī yaad aa ke ghaḌī ghaḌī agar āñsuoñ ko hañsā na de

merī ummīd ke sūraj ko Dubo ke har shaam
vo dikhātā rahā dariyā kā tamāsha mujh ko

ab to chup-chāp shaam aatī hai
pahle chiḌiyoñ ke shor hote the

shaam kā tārā, sub.h kā pahlā taarā Thahregā
hajla-e-vasl meñ raat rahegī, baat saveroñ se

palkoñ pe apnī ḳhvāb-e-tajallī sajā.iye
shaam aa.ī hai to raat kā lashkar bhī aa.egā

ik jhalak poshish-e-be-zabt se uryānī kī
de ga.ī din ke nasheboñ se phisaltī huī shaam