Tags-Shaam

misāl-e-sub.h-e-bahār tū hai to maiñ huuñ shām-e-ḳhizāñ kī sūrat
chaman chaman ḳhār-o-ḳhas se mere faroġh hai tere rañg-o-bū kā

ye sub.h-o-shām pe phailā huā mirā honā
ye mere aaj meñ kal Dālne pe rahtā hai

hai 'valī' kī zabāñ ko lazzat-baḳhsh
zikr har sub.h-o-shām tujh lab kā

jab ghulī terī rāhoñ meñ shām-e-sitam
ham chale aa.e laa.e jahāñ tak qadam

shaam kī gul-rañg havā kyā chalī
dard mahakne lagā jazbāt meñ

ḳhauf kaisā hai shaam se 'fikrī'
aaj utreñgī phir bulā.eñ kyā

tujhe bhulāne kī koshish to kar rahā huuñ 'ḳhalīl'
ḳhayāl terā sar-e-shām aa hī jaatā hai

jidhar dekho udhar zulmat nazar aatī hai ai 'kashfī'
sahar kā rañg hai jab ye to rañg-e-shām kyā hogā

dekhte dekhte dhundlā ga.e manzar saare
terī zulfoñ kī tarah shaam bikhartī jaa.e

vo vaqt-e-sub.h ruḳhsat ho rahe haiñ
yahī hai shām-e-ġham kī ibtidā kyā

shaam kī gahrī ūñchā.ī se
ham ne dariyā ko dekhā thā

shaam to jaise ḳhvāb meñ guzrī
aadhī raat nasha TuuTā thā

is tasavvur se ki shab bhar tirī rah dekheñge
shaam aatī hai to dil Duub ke rah jaatā hai

kahtī hai dulhan shaam kī bāloñ ko bikhere
yuuñ niiñd bhī āñkhoñ se uḌaa.ī nahīñ jaatī

har sub.h-e-alam shām-e-sitam kā hai tasalsul
kyā dil pe guzartī hai batā.ī nahīñ jaatī

ḳhauf lagtā hai mujhe raushnī meñ jaane se
shaam ke vaqt bhī maiñ sham.a jalātā hī nahīñ

hamārī shaam kī saa.at kī lazzat-e-be-nām
ki jur.e jur.e se taḳht-e-ravāñ sā uThtā hai

zard peḌoñ pe shaam hai giryāñ
jī udāsī ke dasht meñ hairāñ

kyā huā vīrāñ kiyā gar mohtasib ne mai-kada
jam.a phir kal shaam tak har ek shai ho jā.egī