Tags-Shaam

shaam hotī hai to yaad aatī hai saarī bāteñ
vo dopahroñ kī ḳhamoshī vo hamārī bāteñ

shām-e-sad-rañg mire ā.ina-ḳhāne meñ Thahar
maiñ ne tasvīr banānī hai tire ġhāze se

shaam ko ghar se nikal kar na palaTne vaale
dar-o-dīvār se saa.e tire ruḳhsat na hue

phir ek shaam dar-e-dil pe dastakeñ jāgīñ
aur ek ḳhvāb ke hamrāh nāma-bar aayā

ajiib shaam thī jab lauT kar maiñ ghar aayā
koī charāġh liye muntazir nazar aayā

maiñ kyā jānūñ qalaq kyā chiiz hai par itnā jānūñ huuñ
mile hai dil ko pahlū meñ mire shaam o sahar koī

shaam aatī thī din guzarne par
kyā huā kyuuñ abhī se guzrī hai

haiñ payām-e-āmad-e-shām-e-ġham ruḳh-e-āftāb kī zardiyāñ
ye tamām din to kuchh aur thā magar ab charāġh-e-mazār hai

kitne ġham haiñ jo sar-e-shām sulag uThte haiñ
chāra-gar tū ne ye kis dukh kī davā bhejī hai

itne mānūs hue mujh se mire ghar ke charāġh
shaam hote hī mujhe dekh ke jal jaate haiñ

savād-e-shām ke ḳhāmosh jugnuoñ se kaho
tumhīñ charāġh jalāo ki raushnī kam hai

sahar ko shaam samajhnā jo bas kī baat nahīñ
yahī savāl uThāo ki raushnī kam hai

Duubī zavāl-e-shām ke hamrāh har ummīd
palkoñ se TuuT kar jo girā thā so ḳhvāb thā

tirā jalva shām-o-sahar dekhte haiñ
salīqe se shams-o-qamar dekhte haiñ

ḳhayāl-e-gardish-e-shām-o-sahar meñ rahtā huuñ
maiñ ghar meñ rahte hue bhī safar meñ rahtā huuñ

'mīr' se bai.at kī hai to 'inshā' miir kī bai.at bhī hai zarūr
shaam ko ro ro sub.h karo ab sub.h ko ro ro shaam karo

qabīla qāfila qaidī qatāreñ
ye manzar shaam tak phailā huā hai

saada kāġhaz pe koī naam kabhī likh lenā!
ho sake milne kī ik shaam kabhī likh lenā!

jaise sahrāoñ meñ har shaam havā chaltī hai
is tarah mujh meñ chalo aur mujhe jal-thal kar do

is se pahle bhī to aisī hī ghaḌī aa.ī thī
sub.h-e-vahshat kī tarah shām-e-ġharībāñ kī tarah