Tags-Shaam

āh-o-nāla ne kuchh asar na kiyā
hijr kī shaam ko sahar na kiyā

sub.h-o-shām be-ma.anī
be-sukūn-e-be-ummīd

ek din thakā-māñda
ek shaam be-ma.anī

chahaktī shaam meñ ma.asūm qahqahoñ ke biich
sajī hai kyuuñ tire sar par ridā udāsī kī

allāh-re shām-e-ġham mirī be-iḳhtiyāriyāñ
ik dil hai paas vo bhī nahīñ iḳhtiyār meñ

kaaTī hai ġham kī raat baḌe ehtirām se
aksar bujhā diyā hai charāġhoñ ko shaam se

guzar rahī hai yūñhī shām-e-zindagī 'sājid'
ki ik charāġh jalāte haiñ ik bujhāte haiñ

sub.h-e-hayāt le le ai zulf-e-yār lekin
maiñ tujh se is ke badle ik shaam chāhtā huuñ

añdherī shaam thī bādal baras na paa.e the
vo mere paas na thā aur maiñ khul ke royā thā

dauḌte ḳhuun kī ik lahar bahut kaafī hai
shafaq-e-shām ko itnī bhī hayā kyuuñ aa.e

bas ek shaam sar-e-dasht-e-karbalā utrī
phir us ke ba.ad gharoñ se alam nikaltā rahā

halkī bārish thī havā thī shaam thī
ham ko apnā bhīgnā achchhā lagā

shaam jaise āñkheñ jhapkāne lagī
us ke hāthoñ meñ diyā achchhā lagā

jo dekhiye to zamāna hai tez-rau kitnā
tulū-e-sub.h abhī hai to vaqt-e-shām abhī

kumhlā na jaa.e gulshan-e-shām-o-sahar 'hazīñ'
muddat se chal rahī hai sulagtī huī havā

koī palkoñ se utartī raat ko roke zarā
shaam kī dahlīz par ik saaya hai sahmā huā

havā-e-shām-e-judā.ī hai aur ġham lāhaq
na jaane jism kī dīvār kab bikhar jaa.e

muñh khole to roz hai raushan zulf bikhere raat hai phir
in tauroñ se āshiq kyūñ-kar sub.h ko apnī shaam kareñ

shām-e-firāq shiddat-e-ġham be-shumār hai
mushtāq-e-dīd aañkh bhī ab ashk-bār hai

kaun sī shaam nahīñ sub.h huī ai maġhrūr
ek din hotī hai ye zulf-e-siyah-fām safed