Tags-Shaam

phir aaj shaam se paikār jaan o tan meñ hai
phir aaj dil ne kisī ko bhulā diyā hogā

shām-e-hastī kā phaḌphaḌātā charāġh
lau bhalā aur se lagātā kyā

kahtī hai ye shaam kī narm havā phir mahkegī is ghar kī fazā
nayā kamra sajā na.ī sham.a jalā tire chāhne vaale aur bhī haiñ

tujh se chhuT kar bhī guzarnī thī so guzrī lekin
lamha lamha sahar o shaam ka.ī yaad aa.e

ai sub.h-e-der-ḳhez unheñ āvāz de jo hai
ik shām-e-zūd-ḳhvāb ke sukh meñ magan paḌe

shaam lahakte jazboñ vaalī 'fikrī' kab kī raakh huī
chāñd-rū pahlī kirnoñ vaalā dard kā maarā lagtā hai

kaTne lagīñ rāteñ āñkhoñ meñ dekhā nahīñ palkoñ par aksar
yā shām-e-ġharībāñ kā jugnū yā sub.h kā taarā hotā hai

chīḳh rahe haiñ ḳhālī kamre
shaam se kitnī tez havā hai

sher 'munīr' likhūñ maiñ uTh kar sehn-e-sahar ke rañgoñ meñ
yā phir kaam ye nazm-e-jahāñ kā shaam Dhale ke ba.ad karūñ

yuuñ bhī guzrī haiñ mirī shām-o-sahar paanī meñ
ashk ban ban ke bahā ḳhūn-e-jigar paanī meñ

shaam huī phir josh-e-qadah ne bazm-e-harīfāñ raushan kī
ghar ko aag lagā.eñ ham bhī raushan apnī raat kareñ

tanhā.ī ke aalam meñ aksar dil us se bahaltā hai 'shevan'
tārīki-e-shām-e-hijrāñ meñ ġham kī bhī zarūrat hotī hai

javānī magar is qadar mastiyāñ
shab-o-roz shām-o-sahar mastiyāñ

huī jo shaam to dil meñ udāsiyāñ utrīñ
charāġh jalne lage haiñ to bujh gayā huuñ maiñ

is ko terī yaad kahūñ yā apnī yaad
shaam se pahle ek diyā jal jaatā hai

shaam se sub.h talak dil thā tirī sarhad meñ
aise hālāt meñ to tiir ko chal jaanā thā

ġhurūb-e-shām hī se ḳhud ko yuuñ mahsūs kartā huuñ
ki jaise ik diyā huuñ aur havā kī zad pe rakkhā huuñ

rah-rav-e-tamannā kī dāstāñ hai bas itnī
sub.h o shaam ik dhun meñ ḳhud ko nīm-jāñ rakhnā

din se fursat kabhī mile to suno
shaam kā saaz raat kī āvāz

vo sub.h o shaam miTTī ke qasīde bhī sunātā
aur us ne haath bhī ġhaddār par rakkhā huā thā