Tags-Shaam

ġham-e-jahāñ ne kiyā is qadar ḳharāb ki maiñ
jo dostoñ meñ gizārī thī shaam bhuul gayā

visāl kā koī imkān hī na thā 'ḳhāvar'
vo zar-nigār-e-sahar thā ġhubār-e-shām the ham

din bhar jo sūraj ke Dar se galiyoñ meñ chhup rahte haiñ
shaam aate hī āñkhoñ meñ vo rañg purāne aa jaate haiñ

kis kāñdhe par ashk bahā.ūñ shaam ga.e
kis ko apne zaḳhm dikhā.ūñ shaam ga.e

dhuup ke maare logoñ ko bhī sahrā meñ
mil jaatī hai peḌ kī chhāñv shaam ga.e

saarā din is uljhan hī meñ biit gayā
kaise apnā dil bahlā.ūñ shaam ga.e

ghar se chalte maiñ ne aksar sochā hai
shāyad hī maiñ luuT ke aa.uuñ shaam ga.e

TukḌe TukḌe jab baT jā.ūñ shaam ga.e
din kā saarā qarz chukā.ūñ shaam ga.e

par phailā.e murġhā bolā mīr-'ayāz'
jaagā mere man kā gaañv shaam ga.e

muntazir rahtī thī har shaam tirī qurbat kī
tū nahīñ jab to mujhe shaam se kuchh kaam nahīñ

isī ḳhayāl meñ guzrī hai shām-e-dard akasr
ki dard had se baḌhegā to muskurā dūñgā

tanhā fasīl-e-shahr pe baiThī huī thī shaam
jab dhuñdlakoñ ne shor machāyā to Dar lagā

kal shaam hī to us se milī thī mirī nazar
shiddat mire ḳhumār kī us tak pahuñch ga.ī

akelā ghūmtā phirtā rahā maiñ dariyā par
vahāñ se shaam Dhale ek baaġh meñ aayā

har ek shaam sañvar jā.egī mirī 'mohsin'
har ek baat tumhārī hai shā.irī kī tarah

āñkhoñ meñ vo shaam kā TukḌā aksar chubhtā rahtā hai
ghar meñ āñdhī jab aa.ī thī sham.eñ jalne vaalī thiiñ

ādatan māyūs ab to shaam hai
hijr to bas muft hī badnām hai

shām-o-sahar kā naam na thā
aise bhī dekhe din aur raat

bhiig jaatī haiñ is ummīd pe āñkheñ har shaam
shāyad is raat vo mahtāb lab-e-jū aa.e

jab koī jhukne lagegā shaam kī dahlīz par
gumbad-e-mauhūm kā maiñ mubtanā ho jā.ūñgā