Tags-Shaam

sub.h-e-azal kā ruup ki shām-e-abad kā giit
saaya ho dhuup ho ki gumāñ kuchh na kuchh to ho

sub.h-e-bahār-o-shām-e-ḳhizāñ kuchh na kuchh to ho
be-nām zindagī kā nishāñ kuchh na kuchh to ho

abhī to shaam huī hai abhī to aa.e ho
abhī se pūchh rahe ho ki raat kitnī hai

har sub.h pe saaya sā hai kuchh talḳhī-e-shab kā
har shaam ko andesha-e-fardā hai koī aur

dil ḳhush na huā zulf-e-pareshāñ se nikal kar
pachhtā.e ham is shām-e-ġharībāñ se nikal kar

raushnī aur tīrgī kī sarhadeñ thāme hue
darmiyāñ din raat ke bahtā hai dhārā shaam kā

ḳhema-zan haiñ chāñd ke raste meñ gahrī badliyāñ
āñdhiyoñ kī zad meñ hai pahlā sitāra shaam kā

le gayā vo saath apne husn saarā shaam kā
hijr kī tasvīr hai ab har nazāra shaam kā

Dūbte sūraj kā manzar dekhnā 'jāved' roz
mashġhala hai ek muddat se hamārā shaam kā

lauT kar vo shaam se pahle hī ghar aane lagā
un se shāyad chhin gayā koī sahārā shaam kā

shaam gulnār huī jaatī hai dekho to sahī
ye jo niklā hai liye mish.al-e-ruḳhsār hai kaun

aaj dhanak meñ rañg na hoñge vaise jī bahlāne ko
shaam hue par niile piile kuchh ballōn uḌā denā

abhī ye shaam kā manzar bahut hasīñ hai 'shamīm'
Dhalegī raat to aa kar yahī Darā.egā

yuuñ tasavvur meñ dabe paañv tirī yaad aa.ī
jis tarah shaam kī bāñhoñ meñ sitāre aa.e

shām-e-firāq aisā mahsūs ho rahā hai
har ek shai gañvā dī har ek shai ko pā ke

kahīñ andar andar sulagtī thī chiñgārī koī
magar hādsa āḳhir-e-kār shām-e-guzishta huā hai

kī shab-e-hashr mirī shām-e-javānī tum ne
chheḌī kis daur kī kis vaqt kahānī tum ne

na udaas ho na malāl kar kisī baat kā na ḳhayāl kar
ka.ī saal ba.ad mile haiñ ham tere naam aaj kī shaam hai

mire ḳheme ḳhasta-hāl meñ haiñ mire raste dhund ke jaal meñ haiñ
mujhe shaam huī hai jañgal meñ mire saare sitāre zavāl meñ haiñ

terī is sub.h binā gosh-o-ḳhat-e-mushkīñ suuñ
sair kartā huuñ ajab shām-o-sahar shām-o-sahar