Tags-Shaam

phir vahī shaam vahī dard vahī apnā junūñ
jaane kyā yaad thī vo jis ko bhulā.e ga.e ham

gum-sum sā khaḌā hai koī darvāza-e-dil par
is shaam kā manzar to dil-āvez bahut hai

saare āsār haiñ judā.ī ke
surma.ī shaam hai suhānī vahī

palkoñ pe kuchh hasīn se motī sajā gayā
phir suunī suunī shaam kā manzar mire liye

bahut dinoñ se mire saath thī magar kal shaam
mujhe pata chalā vo kitnī ḳhūb-sūrat hai

havā-e-shām tire saath ham bhī jhūmte haiñ
kisī ḳhayāl kisī rañg ke ishāre par

ye shām-e-va.ada hai ki paḌāv hai vaqt kā
ik lamha ik sadī ke barābar lagā mujhe

rañg-e-shafaq se shaam ko miltā hai ye patā
ab āsmāñ pe gard mire kārvāñ kī hai

mai piinā 'adam' aur qadam chūmnā un ke
hai shaġhl yahī ab sahar-o-shām hamārā

kar baiThe haiñ ham bhuul ke tauba jo sahar ko
shīshe ko ta.āqub hai sar-e-shām hamārā

sub.h-e-azal hai sub.h-e-husn shām-e-abad hai dāġh-e-ishq
dil hai maqām-e-irtibāt silsila-e-darāz meñ

shaam bāñhoñ meñ liye raat kī raanī aa.ī
ai mohabbat tujhe dene ko salāmī aa.ī

bhulā chukī dil se shām-e-ġhurbat har ek naqsha har ek sūrat
hamārī āñkhoñ meñ lekin ab tak faroġh-e-sub.h-e-vatan hai baaqī

ab ḳhud se bhī milne kī fursat hī kahāñ ham ko
har shaam tirī mahfil har raat tirī bāteñ

jhulastī shaam badalne lagī hai pairāhan
tire badan kī tamāzat meñ sehr kaisā hai

aatā na ho barāt sitāroñ kī le ke chāñd
ruḳhsār surḳh kyuuñ hue jaate haiñ shaam ke

vasl meñ bhī rahā firāq kā ġham
shaam hī se sahar kā khaTkā thā

ghanTiyāñ bajne se pahle shaam hone ke qarīb
chhoḌ jaatā maiñ tirā gaañv magar mere nasīb

charāġh rakh ke sar-e-shām dil ke ziine par
mujhe ḳhabar nahīñ hotī sudhārtā hai koī

sub.h-o-shām filistīñ meñ ḳhuuñ bahtā hai
sāya-e-marg meñ kab se insāñ rahtā hai