Tags-Shahr

'ḳhāvar' is shahr meñ ham ahl-e-hunar par ye khulā
ek shai be-hunarī bhī hai hunar se aage

maiñ aaj gaañv meñ chhoḌe to jā rahā huuñ tumheñ
duā karo ki mujhe shahr kī havā na lage

jo log the badnām shahar bhar meñ
vo log bhī kirdār dekhte haiñ

zamīn-e-sañg se sūraj ugāne vaale haath
kise ḳhabar thī ki us shahr meñ qalam hoñge

yahī dil jo ik buuñd hai bahr-e-ġham kī
Dubo degā sab shahr tūfān kar ke

ajiib soch hai is shahr ke makīnoñ kī
makāñ na.e haiñ magar khiḌkiyāñ purānī haiñ

zarā dekh jalte hue shahr ko
siyāsat ke rauzan haiñ sab se baḌe

talab kī rāhoñ meñ saare aalam na.e na.e se
shajar hajar log shahr mausam na.e na.e se

shahr kī gasht meñ haiñ sub.h se saare mansūr
ab to mansūr vahī hai jo sar-e-dār nahīñ

mujh se tum kaam na lo kaam meñ laao mujh ko
koī to shahr meñ aisā hai ki be-kār nahīñ

is kūcha se guzro ho na tum us se milo ho
is shahr meñ kaise guzar auqāt karo ho

is shahr meñ kis se mileñ ham se to chhūTīñ mahfileñ
har shaḳhs terā naam le har shaḳhs dīvānā tirā

apnī hī ravānī meñ bahtā nazar aatā hai
ye shahr bulandī se dariyā nazar aatā hai

ham ko ḳhabar hai shahr meñ us ke sañg-e-malāmat milte haiñ
phir bhī us ke shahr meñ jaanā kitnā achchhā lagtā hai

vaqt ke hāthoñ zamīr-e-shahr bhī maarā gayā
rafta rafta mauj-e-ḳhūñ sar se guzartī jaa.e hai

pyaas ke shahar meñ dariyā bhī sarāboñ kā milā
manzil-e-shauq tarastī rahī paanī ke liye

ye shahr hai yā ḳhema hai dushman kā sipah kā
āvāz ke zaḳhmoñ se lahū hai mirā sar dekh

kyā sabaq paḌhāte haiñ shahr ko diyānat kā aa gayā hai jab is par faisla adālat kā
aap kyuuñ pakaḌte haiñ un kī choriyāñ yaaro ret is nagar kī hai iiñT is nagar kī hai

ghurkhiyoñ ke gaañv se ret uThā ke laa.e the iiñT shahr se lī thī ye na thā magar ma.alūm
jhelnā paḌeñgī phir ghar kī ghurkiyāñ yaaro ret is nagar kī hai iiñT is nagar kī hai

ye to batlāo hameñ shahr basāne vaalo
dil kā vīrāna kab ābād kiyā jā.egā