Tags-Shahr

the bahut ḳhaas jo sar taan ke chalte the yahāñ
ab isī shahr meñ vāqif haiñ anā se kitne

luuT kar pahle-pahal aa.e the jab us shahr se
ajnabī lagtī thiiñ āñkhoñ ko shanāsā sūrateñ

jaane kaise maiñ sadā be-bāl-o-par uḌtā rahā
dostoñ ke shahar meñ misl-e-ḳhabar uḌtā rahā

'inshā'-jī uTho ab kuuch karo is shahr meñ jī ko lagānā kyā
vahshī ko sukūñ se kyā matlab jogī kā nagar meñ Thikānā kyā

jab shahr ke log na rastā deñ kyuuñ ban meñ na jā bisrām kare
dīvānoñ kī sī na baat kare to aur kare dīvānā kyā

hamāre shahr kī galiyoñ meñ qahr Dhāte hue
lahū kā sail dar aayā to aañkh bhar aa.ī

sab ne apnī apnī āñkhoñ par naqābeñ Daal liiñ
jo likhā hai shahr kī dīvār par dekhegā kaun

bahte rahte haiñ in āñkhoñ se musalsal aañsū
shahr-e-dil vādī-e-be-āb huā jaatā hai

abhī to ghar meñ na baiTheñ kaho buzurgoñ se
abhī to shahr ke bachche salām karte haiñ

kis shahr-e-tilismāt meñ le aayā taḳhayyul
jis samt nazar jaa.e nazar aa.e mirā jism

niiñd meñ gum haiñ dasht-o-bāġh bujh ga.e shahr ke charāġh
aise meñ jā.ūñ maiñ kidhar raat bahut guzar ga.ī

merī bujhtī huī āñkhoñ se kiran chuntā hai
merī āñkhoñ kā khañDar shahr-e-ma.ānī niklā

gaañv meñ eid phirā kartī thī galiyāñ galiyāñ
aur is shahar meñ thak kar yūñhī so jaatī hai

qadam qadam pe Hayā-soziyon kā aalam hai
sañvar sañvar ke nigārān-e-shahar chalte haiñ

apnī talāsh hai hameñ āñkhoñ ke shahr meñ
ā.īna jab se apne muqābil nahīñ rahā

bas tū mirī āvāz se āvāz milā de
phir dekh ki is shahr meñ kyā ho nahīñ saktā

aag ke sho.aloñ se saarā shahr raushan ho gayā
ho mubārak ārzū-e-ḳhār-o-ḳhas puurī huī

dekhā to ahl-e-shahr sab us ko hī lene aa.e the
ik ajnabī jo saath thā raah meñ kam-navard sā

hai ajiib shahr kī zindagī na safar rahā na qayām hai
kahīñ kārobār sī dopahar kahīñ bad-mizāj sī shaam hai

karbalā to aaj bhī miltā hai har har gaam par
shahar meñ lekin husain-e-bā-vafā koī nahīñ