Tags-Shahr

vo le ke katraneñ guḌiyā banāne lag ga.ī thī
ki shahr-zādī ko gaañv ke haath lag ga.e the

bahut is shahr meñ rusvā huuñ 'rāshid'
magar kyā vāqa.ī aisā bhī huuñ maiñ

shahr to kab kā jal chukā 'asġhar'
uTh rahā hai magar dhuāñ ab tak

jis meñ kuchh qabreñ hoñ kuchh chehre hoñ kuchh yādeñ hoñ
kitnā dushvār hai us shahr se hijrat karnā

shahr-e-junūñ kī dhuup jalā degī jism-o-jāñ
chaliye chaleñ ghanere chanāroñ ke paas ham

shāh-rāhoñ par ukhḌe ukhḌe saañs paḌe the
dariyā bhārī shahr ke nīche dabā huā thā

kisī ran meñ saath husain kā deñ kis nahr se paanī le aa.eñ
is shahr ke saare nauhagar koī aisī bhuul nahīñ karte

vo mere ḳhvāboñ ko āñkhoñ se chhīn letā hai
use na shahr-e-tamannā kī hukmarānī de

shahr sāgar kā bhī ham-zād kahāñ
mauj-dar-mauj biphartā jaa.e

terī aamad kā ik jhoñkā
ujḌā shahr basā saktā hai

hamāre shahr meñ kuchh log aise rahte haiñ
safar kī samt batāte haiñ jin ko raat ke rañg

bahut se shahr rahne ke liye hāzir the lekin
hamesha zinda rahne ke liye sahrā chunā thā

ye dasht be-rah-ravoñ kī bastī ye shahr zindāniyoñ kā maskan
agarche ḳhalvat-nashīñ nahīñ ham magar kahāñ anjuman sajā.eñ

gul-parastī par na kar isrār ai 'manzūr' tū
dekh har ik moḌ par haiñ shahr meñ patthar bahut

yuuñ har ik fard-e-tahayyur kī hai tasvīr 'shamīm'
shahr meñ rāsta bhūlā huā bachcha jaise

har shāḳh pe thī vafā kī qindīl
ai shahr batā kahāñ vo ban hai

vo ajab ik shahr thā jis meñ kaTe yuuñ maah o saal
din se maiñ vāqif nahīñ thā shab thī anjānī mirī

har galī achchhī lagī har ek ghar achchhā lagā
vo jo aayā shahr meñ to shahr bhar achchhā lagā

baḌe sukūñ se rahe mom ke badan vaale
tumhārā shahr tah-e-āftāb thā ki nahīñ

shahr ke raste kahīñ shahr meñ kho jaate haiñ
shahr ko ab koī dehāt se rasta nikle