Tags-Shahr

amīr-e-shahr ne dastār chhīn lī us kī
sila ajiib diyā roz kī salāmī kā

tū ra.īs-e-shahr-e-sitam-garāñ maiñ gadā-e-kūcha-e-āshiqāñ
tū amiir hai to batā mujhe maiñ ġharīb huuñ to burā hai kyā

shahr meñ oḌhnī bhī hai tahzīb
dasht meñ ḳhaak bhī uḌānī hai

qais jañgal ko agar chhoḌ ke aa jaatā 'ra.īs'
to mire shahr ke laḌke bhī satāne lagte

jabīñ pe shahr kī likh kar fazā udāsī kī
bahut hai ḳhush koī de kar duā udāsī kī

tujhe qāzi-e-shahr kaise batā.ūñ
mirā ghar mire pahra-dāroñ ne luuTā

aahoñ kī tāmīreñ kī thiiñ sabr ke baaġh lagā.e the
shahr-e-vafā meñ mehnat-e-jāñ kī roz na.ī mazdūrī thī

gardish-e-vaqt ko ḳhātir meñ na laane vaalī
shahr meñ do na.ī āñkhoñ kā baḌā charchā hai

ghar se gaatā huā niklā to huuñ maiñ naġhma-e-ehsās magar
shahr ke shor meñ dab jaa.eñ na sar lai na badal jaa.e kahīñ

shahr vāloñ ko parakhnā koī mushkil to nahīñ
bātoñ bātoñ hī meñ khul jaate haiñ auqāt samet

us ke chhūte hī badan aise chamak uThtā hai
jaise jal uTThe koī shahr mazāfāt samet

varna ham shahr-e-gul-āzār meñ kab aate the
ye to ham ko bharī-barsāt liye phirtī hai

shahr jin ke naam se zinda thā vo sab uTh ga.e
ik ishāre se talab kartā hai vīrāna mujhe

der se pahuñche haiñ ham duur se aa.e hue log
shahr ḳhāmosh hai sab ḳhaak uḌā dī ga.ī kyā

nok-e-nashtar se khilā.ī ga.iiñ kaliyāñ kitnī
jaane is shahr kī kyā āb-o-havā Thahregī

irfān-o-āgahī ke sazā-vār ham hue
soyā paḌā thā shahr ki bedār ham hue

bas gayā jab vo shahr-e-dil meñ mire
phir maiñ is shahr meñ rahā bhī nahīñ

chehroñ kī dhuup āñkhoñ kī gahrā.ī le gayā
ā.īna saare shahr kī bīnā.ī le gayā

bas ga.e yaar shahr meñ jā kar
rah ga.e dasht meñ hamīñ tanhā

rah-e-hayāt kā maiñ aisā ik musāfir thā
ki jaise shahr kī saḌkoñ se bus kā rishta thā