Tags-Shama

garm-rau rāh-e-fanā kā nahīñ ho saktā patañg
us se to sham.a-namat sar bhī kaTāyā na gayā

tīrgī-e-ḳhush-gumāñ hai jī jahāñ lagne lage
sham-e-vahshat ik jalā.ūñ is jahān-e-shād meñ

adam ke tārīk rāste meñ koī musāfir na raah bhūle
maiñ sham-e-hastī bujhā kar apnī charāġh-e-turbat jalā rahā huuñ

sham-e-mehrāb-e-vafā ban ke hayāt-e-rusvā
dil-nigārī kā mirī kuchh to silā detī hai

apne apne bas kī bāteñ ahl-e-mahfil jaan leñ
sham-e-mahfil ke qarīñ phir liije parvāne ga.e

sham-e-sā.at ne bahut aks tarāshā lekin
kuchh hayūle dar-e-zulmāt pe rah jaate haiñ

raunaq-e-hastī hai ishq-e-ḳhāna vīrāñ saaz se
anjuman be-shamā hai gar barq ḳhirman meñ nahīñ

patañgā sham.a pe martā hai kyā burā.ī hai
use kisī ne bhī rokā hai jis kī aa.ī hai

us sham.a-rū se qasd na milne kā thā hameñ
par dekhte hī mom-sifat dil pighal gayā

ham ko sahāre kyā raas aa.eñ apnā sahārā haiñ ham aap
ḳhud hī sahrā ḳhud hī divāne sham-e-nafas parvāne haiñ

ai sham.a ham se soz-e-mohabbat ke zabt siikh
kam-baḳht ek raat meñ saarī pighal ga.ī

sham.a se hai bazm-e-añgusht-e-tahayyur dar dahan
sho.ala-e-āvāz-e-ḳhūbāñ par ba-hañgām-e-simā.a

parda-e-sāz meñ bhī soz kā hāmil honā
sham.a se siikh sharīk-e-ġham-e-mahfil honā

ab sham-e-hasrat lau de uThī hai
ai sarsar-e-ġham dāman bachā kar

tum apnī sham-e-tamannā ko ro rahe ho 'farāz'
in āñdhiyoñ meñ to pyāre charāġh sab ke ga.e

duur kyā sham.a kabhī rahtī hai parvāne se
aap kyuuñ ruuTh ga.e apne hī dīvāne se

ḳhvāhish se kahīñ koī māhaul badaltā hai
dil sham.a kā jaltā hai tab mom pighaltā hai

na sham-e-bazm pe kuchh aañch aa.egī 'iqbāl'
ḳhud apnī aag meñ jalte raheñge parvāne

nigāh-e-ishq meñ dair-o-haram kī qaid nahīñ
kahīñ bhī sham.a jale uḌ chaleñge parvāne

kahāñ haiñ aaj vo sham-e-vatan ke parvāne
bane haiñ aaj haqīqat unhīñ ke afsāne