Tags-Shama

kyuuñ chāhne vāloñ se ḳhafā aap haiñ itne
parvānoñ se yuuñ sham.a ko jalte nahīñ dekhā

mohabbat-āshnā dil maz.hab-o-millat ko kyā jaane
huī raushan jahāñ bhī sham-e-parvāna nahīñ aayā

kahtī hai ye shaam kī narm havā phir mahkegī is ghar kī fazā
nayā kamra sajā na.ī sham.a jalā tire chāhne vaale aur bhī haiñ

gul kar ke sham.a so.e the ham nā-murād aaj
raushan kisī ke aane se kāshāna ho gayā

ā.īna dekhte hī vo dīvāna ho gayā
dekhā kise ki sham.a se parvāna ho gayā

natīja kuchh nahīñ hai sham.a ke aañsū bahāne se
ye sarf-e-be-mahal āshiq kā āḳhir ḳhūñ-bahā kyuuñ ho

soz-e-darūñ kiyā jo mirā sham.a ne bayāñ
jal kar zabān kaaT lī mere gavāh kī

tujh ko denā ho agar zulmat-e-hijrāñ ko shikast
sham.a bujh jaa.e magar dil na bujhā.e rakhnā

soz-e-ulfat se jale donoñ barābar lekin
sham.a badnām hai aur naam hai parvāne kā

hijāb-andar-hijāb amvāj-e-tūfān-e-tajallī haiñ
faroġh-e-sham.a se parvāna hai ātish-ba-jāñ phir bhī

sham.a kā mai kā shafaq-zār kā gulzār kā rañg
sab haiñ aur sab se judā hai lab-e-dīdār kā rañg

har ahl-e-anjuman kī zarūrat thī raushnī
maiñ sham-e-anjuman thā pighalnā paḌā mujhe

ḳhush-nasībī ye mirī hai ki vo ghar aa.e haiñ
sham.a tū saath nibhā vaqt-e-azāñ hone tak

ghar meñ le aa.e tumheñ chaah se karne shādī
ki tum is ġham-kade meñ sham-e-shab-tār hue

iḳhtilāf-e-shakl ne dhokā nigāhoñ ko diyā
varna jo kuchh sham-e-sozāñ thī vahī parvāna thā

bas ek hī sham.a jal rahī thī huā thā saarā chaman ye raushan
haiñ jal rahī ab hazār sham.eñ chaman meñ hai phir bhī tīrgī kyoñ

kab jalī sham-e-tamannā hameñ kuchh yaad nahīñ
itnā ma.alūm hai jal kar use bujh jaanā hai

chaliye ai jān-e-shām aaj tumheñ
sham.a ik qabr par jalānī hai

kyuuñ na muztar huuñ use dekh ke dekho to sahī
sham.a ke sāmne kyā haal hai parvāne kā

us sham.a kī majlis meñ jaanā hameñ phir vaañ se
ik zaḳhm-e-zabāñ taaza har roz uThā jaanā