Tags-Shama

tavañgaroñ ko mubārak ho sham-e-kafūrī
qadam se yaar ke raushan ġharīb-ḳhāna huā

shumār-e-ashk-e-sham-e-bazm mumkin
hamārā dil pighaltā kaun dekhe

ek hālat par na dekhā us ko ham ne ek aan
gah gul o gah bulbul o gah sham.a o gah parvāna hai

gul kī aur bulbul kī sohbat ko chaman kā shāna hai
sarv hai juuñ sham.a tis par fāḳhta parvāna hai

thiiñ jo kal tak jalva-afrozī se sham-e-anjuman
aaj vo shakleñ charāġh-e-zer-e-dāmāñ ho ga.iiñ

tārīki-e-mahfil kā shikva tum karte ho ai dīvāno kyuuñ
ḳhud sham.a bujhā dī hai tum ne ḳhud-baḳht tumhārā phuuT gayā

'parvīñ' jalāo sham-e-amal gor ke liye
sūraj kā nuur chāñd ke vahāñ chāñdnī nahīñ

ujālā mahfiloñ meñ kar ke bhī aañsū hī haath aa.e
na raas aa.ī kabhī ḳhud sham.a ko bhī raushnī apnī

parvāne kī tapish ne ḳhudā jaane kaan meñ
kyā kah diyā ki sham.a ke sar se dhuāñ uThā

kyā kam-suḳhanoñ ko sham.a kahiye
sham.oñ kī zabāñ hai haath bhar kī

kuchh roz Thahar aur bhī ai sham.a-e-shab-afroz
pur-nūr rahe merā shabistāñ koī din aur

na aa.eñ aap to mahfil meñ kaun aatā hai
jale na sham.a to parvāne thoḌī hote haiñ

kyā batā.ūñ ki hai kis zulf kā saudā mujh ko
dūd-e-har-sham.a garebāñ nazar aayā mujh ko

ḳhudā gar ḳhāna sāmān-e-qazā kartā ye 'uzlat' ko
to parvānoñ kī raakh ai sham.a sub.h-e-āsmāñ kartā

bazm-e-ḳhayāl meñ tire husn kī sham.a jal ga.ī
dard kā chāñd bujh gayā hijr kī raat Dhal ga.ī

raushan hai isī se mirā kāshāna-e-hastī
is sham-e-mohabbat ko bujhā bhī nahīñ saktā

sar-e-shām gul ho ga.ī sham-e-bālīñ
salāmat haiñ ab tak sahar karne vaale

ḳhalvat hai be-hijāb haiñ vo jal rahī hai sham.a
achchhā hai us ko aur jalā.eñ tamām raat

hogī ab ārāsta turbat shahīd-e-nāz kī
chādar-e-gul bichhtī hai sham-e-mazār aane ko hai

sham.a jaltī hai to ro detī hai soz-e-ġham se
aur parvāne to ārām se jal jaate haiñ