Tags-Shama

dil ko jo yād-e-jalva-e-āriz hai dam-ba-dam
raushan hai sham-e-husn makān-e-ḳhayāl meñ

misāl-e-sham.a jalā huuñ dhuāñ sā bikhrā huuñ
maiñ intizār kī har kaifiyat se guzrā huuñ

hai dīdanī dar-o-dīvār aarzū kī chamak
ajiib raushnī sham-e-mazār-e-shauq kī hai

na thī tā-sub.h kuchh hājat charāg o sham.a o mish.al kī
hamārī bazm meñ shab jalva-gar vo māh-e-paikar thā

ġham nahīñ hotā hai āzādoñ ko besh az-yak-nafas
barq se karte haiñ raushan sham-e-mātam-ḳhāna ham

fart-e-be-ḳhvābī se haiñ shab-hā-e-hijr-e-yār meñ
juuñ zabān-e-sham.a dāġh-e-garmi-e-afsāna ham

vo aap kar rahī hai mudām us kī justujū
sho.ale ko apnā go nahīñ detī surāġh sham.a

bujh ga.ī sham.a kī lau tere dupaTTe se to kyā
apnī muskān se mahfil ko munavvar kar de

zindagī yuuñ kaT rahī hai un ke Thukrāne ke ba.ad
jaise ik mahfil kī hālat sham.a bujh jaane ke ba.ad

ye soz-e-mohabbat hai jab sham.a huī raushan
jal jaatā hai chupke se parvāne ko kyā kahiye

haañ ye saarā khel parvānoñ kī jāñ-bāzī kā hai
sham-e-raushan par madār-e-girya-e-mahfil nahīñ

jalā.ūñ sham.a to āḳhir jalā ke dekhūñ kyā
har ek raat yahāñ shaġhl-e-ġham-parastī hai

na sham.a rotī hai aa kar na barq hañstī hai
maiñ jab se qabr meñ huuñ bekasī barastī hai

vahī haiñ shāhid-o-sāqī magar dil bujhtā jaatā hai
vahī hai sham.a lekin raushnī kam hotī jaatī hai

kahāñ tak parda-e-fānūs se sar kī balā Taltī
azal se laag thī bād-e-fanā ko sham-e-mahfil se

ik sham.a jalī to mahfil meñ har samt ujālā phail gayā
qānūn yahī hai fitrat kā parvāna jalā to kuchh bhī nahīñ

sham.a jaltī hai to parvānoñ kā aatā hai ḳhayāl
aur bujhtī hai to bujhne pe malāl aatā hai

vafā kī sham.a jalāo ki ham ġhazal kah leñ
udaas raat hai aao ki ham ġhazal kah leñ

bujh bujh ke jalī thī qabr par sham.a
jal jal ke tamām ho ga.ī hai

husn majbūr-e-sitam hai ishq majbūr-e-vafā
sham.a ko samjhā.eñ yā samjhā.eñ parvāne ko ham