Tags-Sharab

ye talḳh yādeñ kam-az-kam bhulā to detī hai
sharāb kuchh bhī ho āḳhir sharāb hai saaqī

o mast-e-nāz kaif ye tere suḳhan meñ hai
dhoke kalām par haiñ sharāb-e-chakīda ke

ai harīs-e-mai-kada ḳhūn-e-zindagī na pī
tū sharāb agar piye tujh ko pārsā kahūñ

lahū pilāte haiñ jo log ham ko jīvan-bhar
vo shaam hote hī kyuuñ kar sharāb māñgte haiñ

sū-e-kāba chale to ho 'qaisar'
raah meñ ik sharāb-ḳhāna hai

'sahbā' mire vajūd pe har mai-kade se duur
chhāyā thā vo surūr ki paanī sharāb thā

ḳhuld meñ aa kar sharāb-e-ḳhuld se bhī ijtināb
jām-e-mai se zāhidā inkār qaisar-bāġh meñ

jo un ko lipTā ke gaal chūmā hayā se aane lagā pasīna
huī hai bosoñ kī garm bhaTTī khiñche na kyūñkar sharāb-e-āriz

ai mohtasib na pheñk mire mohtasib na pheñk
zālim sharāb hai are zālim sharāb hai

mujh ko muaaf kījiye rind-e-ḳharāb jaan ke
āñkhoñ pe hoñT rakh diye jām-e-sharāb jaan ke

hai fāqa-mastī kā silsila jab to aa.e saḳhtī qadam meñ kaise
ye nā-tavānī kī larzisheñ haiñ na pī hai maiñ ne sharāb baabā

gardish-e-chashm kā dikhā yak daur
ham kuuñ mast-e-sharāb karte haiñ

qadam qadam pe bichhāo bisāt-e-kaif-o-nishāt
sharāb aur pilāo sambhal na jaa.eñ kahīñ

mirī sharāb kī kyā qadr tujh ko ai vaa.iz
jise maiñ pī ke duā duuñ vo jannatī ho jaa.e

vo gul-farosh kahāñ ab gulāb kis se luuñ
nahīñ rahā mirā saaqī sharāb kis se luuñ

ai 'razā' ham mil ga.e us se gale pī kar sharāb
go haiñ dīvāne par apne kaam ke syāne haiñ ham

jumbish-e-bād-e-sahar se hai tamavvuj mai meñ
quvvat-e-jān-e-hazīñ hai nafas-e-jām-e-sharāb

zulf-e-mushkīñ ke liye bū jo chalī aatī hai
hai nasīm-e-saharī ham-nafas-e-jām-e-sharāb

qāfila aish kā tayyār hai rindoñ ke liye
qulqul-e-shīsha-e-mai hai jaras-e-jām-e-sharāb

mai na ho bū hī sahī kuchh to ho rindoñ ke liye
isī hiile se bujhegī havas-e-jām-e-sharāb