Tags-Sharab

phirtā rahtā huuñ maiñ har lahza pas-e-jām-e-sharāb
mujh ko bad-nām karegī havas-e-jām-e-sharāb

TikTikī bāñdh ke dekhā kiyā itnā ki banā
sāya-e-mardum-e-dīda magas-e-jām-e-sharāb

mujh se pūchho asar-e-bāda-e-gul-gūñ vaa.iz
maiñ huuñ rindoñ meñ bahut nukta-ras-e-jām-e-sharāb

ḳham luñDhā duuñ to na chakrā.e kabhī sar merā
ek jur.a meñ gayā bul-havas-e-jām-e-sharāb

ham ne rindoñ kā maqūla ye sunā hai 'shaidā'
sohbat-e-aish meñ zāhid hai ḳhas-e-jām-e-sharāb

vaa.iz mai-e-tuhūr jo piinā hai ḳhuld meñ
aadat abhī se Daal rahā huuñ sharāb kī

tū ham se jo ham-sharāb hogā
bahutoñ kā jigar kabāb hogā

ye vāqi.a mirī āñkhoñ ke sāmne kā hai
sharāb naach rahī thī gilās baiThe rahe

nashsha zamīñ se sū-e-falak le uḌā mujhe
saaqī sharāb ne mirī miTTī ḳharāb kī

saaqī tire karam se ye ummīd hai mujhe
ho roz-e-hashr haath meñ botal sharāb kī

qaazī ke muñh pe maarī hai botal sharāb kī
ye umr bhar meñ ek huī hai savāb kī

sarfa-e-ḳhushk bhī hai ik hiila
karnī zāhid ko thī sharāb shurūa

maqdūr tak sharāb se rakh añkhḌiyoñ meñ rañg
ye chashmak-e-pyāla hai saaqī havā-e-gul

pheñk dī saarī sharāb ai vaa.e be-sabrī-e-shauq
lab tak aane bhī nahīñ paayā thā paimānā hanūz

daur rindoñ kā hai chaltī hai shab-o-roz sharāb
ahd-e-qāzī hai na baaqī na zabān-e-vā.iz

mujh meñ samā na jaa.e is zindagī kī talḳhī
saaqī sharāb denā saaqī sharāb denā

tire haath se mere hoñT tak vahī intizār kī pyaas hai
mire naam kī jo sharāb thī kahīñ rāste meñ chhalak ga.ī

be-minnat-e-sharāb huuñ sarshār-e-imbisāt
tujh nain kā ḳhayāl mujhe jām-e-jam huā

hoñToñ ko sharāb ab pilā de saaqī
rag rag meñ ik aag lagā de saaqī