Tags-Sharab

zāhid jo apne roze se thoḌā savāb de
mai-kash use sharāb pilā.eñ tamām raat

baḌe shabāb pe dard-e-firāq-e-mastī hai
na ho sharāb to pahroñ ghaTā barastī hai

sharāb paisa anā ḳhvāb ishq yā ki suḳhan
kisī bhī shai kā ho nashsha ḳharāb hotā hai

har ek qatre se bahtī riyāz jū-e-sharāb
jo pī ke ham sar-e-zamzam kabhī vuzū karte

sharāb piite hī sajde meñ un ko girnā thā
ye shaġhl baiTh ke mai-nosh qibla-rū karte

sharāb-e-nāb se saaqī jo ham vuzū karte
haram ke log tavāf-e-ḳhum-o-subū karte

kuchh zahr na thī sharāb-e-añgūr
kyā chiiz harām ho ga.ī hai

girā na aañkh se aañsū fareb-e-qismat par
sukūn jis se ho vo iztirāb paidā kar

lutf chaman hai bulbul gulzār ke liye
kaifiyat-e-sharāb hai mai-ḳhvār ke liye

abr kī tīrgī meñ ham ko to
sūjhtā kuchh nahīñ sivā.e sharāb

ḳhālī sharāb-e-ishq se sāġhar kabhī na the
aise to ḳhushk dal ke samundar kabhī na the

huī har baar merī bāriyoñ par bhuul saaqī ko
mujhe ḳhālī diyā jām-e-sharāb avval se āḳhir tak

zamāna kuchh nahīñ samjhegā bas piye jaao
ki zahr-e-ġham kā nasha bhī sharāb jaisā hai

shīshe meñ tire sharāb saaqī
Tuk ham ko bhī de agar bahut hai

kal ke liye kar aaj na ḳhissat sharāb meñ
ye sū-e-zan hai sāqi-e-kausar ke baab meñ

chalo mai-kade meñ basar kareñ ki rahī hai kuchh barakat vahīñ
lab-e-nā-tovāñ kā kabāb hai dam-e-ābvāñ kā sharāb hai

ba-qadr-e-zarf piye aur apnī raah lage
sharāb-ḳhāne kī raunaq hī chal-chalāv se hai

sharāb-e-ishq hai donoñ ke jaam meñ lekin
mirī sharāb meñ ḳhūn-e-vafā ziyāda hai

qalb tak pahuñchī nahīñ jin ke sharāb-e-ma.arifat
aise farzī log da.ave se valī hone lage

'asad' saaqī kī hai dohrī ināyat
sharāb-e-kohna Daalī jām-e-nau meñ