Tags-Sharab

bahut hī talḳh thā ya.anī sharāb aisā thā
savāl yaad nahīñ hai javāb aisā thā

zarf-e-dil aazmā rahī hai sharāb
jaam rakkhe haiñ pārsā ke qarīb

'mīr' un nīm-bāz āñkhoñ meñ
saarī mastī sharāb kī sī hai

jahāñ pe chhāyā sahāb-e-mastī baras rahī hai sharāb-e-mastī
ġhazab hai rañg-e-shabāb-e-mastī ki rind o zāhid bahak rahe haiñ

sharāb ke liye mai-nosh muñh haiñ phailā.e
jam.hā.īyāñ nahīñ vaqt-e-ḳhumār lete haiñ

jām-e-duniyā ko muñh lagā kar dekh
zahar hai yā sharāb hai kyā hai

bharā hai shīsha-e-dil ko na.ī mohabbat se
ḳhudā kā ghar thā jahāñ vaañ sharāb-ḳhāna huā

lage na phir kabhī dāman meñ daaġh un ke 'shamīm'
sharāb-e-nāb se dhoyā hai jin gunāhoñ ko

yuuñ apne jazb meñ gum ho gayā hai ab 'sānī'
sharāb-o-mai kī zarūrat rahī rahī na rahī

sharāb la.al-e-lab-e-dil-barāñ hai mujh kuuñ mubāh
ab aish-o-ishrat-e-donoñ-jahāñ hai mujh kuuñ mubāh

sharāb o shāhid o ḳhalvat siyāh-mastī hosh
isī jahān munīñ begamāñ hai mujh kuuñ mubāh

namāz-e-ishq tumhārī qubūl ho jaatī
agar sharāb se tum ai 'ratan' vazū karte

qarār-e-tarq-e-ta.alluq thā so nibhāyā bhī
sharāb chhoḌ dī maiñ ne magar gilās nahīñ

is tarah gul shagufta hai shabnam se bhiig ke
baiThā ho koī jaise koī nahā kar sharāb meñ

phir kyuuñ na tū ba-ġharq ho jām-e-sharāb meñ
hai āftāb raqs-kunāñ māhtāb meñ

is fitna-zā ko kaun zamāne meñ muñh lagā.e
bad-bū-e-shar hai aa rahī nām-e-sharāb meñ

jannat kā tazkira kabhī kū-e-sanam kī baat
donoñ jahāñ kā lutf hai jām-e-sharāb meñ

kuchh nafas meñ sharāb kī sī mahak
kuchh havā meñ nasha gunāhoñ sā

din hai be-kaif be-gunāhoñ sā
nā-kushāda sharāb-gāhoñ sā

raat bahut sharāb pī raat bahut paḌhī namāz
ek vuzū meñ ho ga.ī mujh se ka.ī ka.ī namāz