Tags-Sharab

fasl-e-bahār aa.ī piyo sūfiyo sharāb
bas ho chukī namāz musallā uThā.iye

surūr-afzā huī āḳhir sharāb āhista āhista
huā vo bazm-e-mai meñ be-hijāb āhista āhista

talḳhī tumhāre va.az meñ hai vā.izo magar
dekho to kis maze kī hai talḳhī sharāb meñ

sau jagah us kī āñkheñ paḌtī haiñ
jaise mast-e-sharāb haiñ donoñ

be piye hī sharāb se nafrat
ye jahālat nahīñ to phir kyā hai

merī har ek sub.h thī āġhosh-e-dilbarī
merī har ek shaam kā unvāñ sharāb thā

sharāb-e-nāb kā qatra jo sāġhar se nikal jaa.e
taḌap ke dil mirā qābū-e-dil-bar se nikal jaa.e

zāhid haram meñ baiTh ke ḳhālī maiñ kyā karūñ
kosoñ yahāñ sharāb kahīñ būñd-bar nahīñ

āb-e-haivāñ ko mai se kyā nisbat
paanī paanī hai aur sharāb sharāb

shor hai har taraf sahāb sahāb
sāqiyā sāqiyā! sharāb sharāb

mazā hai saaqī tire karam se zuhūr merā hai tere dam se
vo baada huuñ jo huuñ mai-kade meñ vo nashsha huuñ jo sharāb meñ huuñ

dimāġh meñ huuñ qadah-kashoñ ke dahan meñ aayā huuñ mah-vashoñ ke
nasha vo huuñ jo sharāb meñ huuñ mazā vo huuñ jo kabāb meñ huuñ

baaġh meñ jaave vo vahshī-chashm agar mast-e-sharāb
nargis us uupar nisār-e-sīm-o-zar deve uḌā

to bole vo ki jise chāheñ ham pilā.eñ sharāb
ḳhushī hamārī tirā is meñ kyā ijārā hai

shikan na Daal jabīñ par sharāb dete hue
ye muskurātī huī chiiz muskurā ke pilā

kisī tarah to ghaTe dil kī be-qarārī bhī
chalo vo chashm nahīñ kam se kam sharāb to ho

kyā jaane hamārī talḳh-kāmī
hai zā.iqa-e-sharāb kaisā

vo jis se duur ho jaa.e ġham-e-jānāñ ġham-e-daurāñ
usī daur-e-sharāb-e-arġhavāñ kā zikr karne do

na miltī hoñ sharāb-e-zindagī kī talḳhiyāñ jin meñ
sunā hai vo 'ziyā' ke dil se aise sher kam nikle

vo muntazir thā sharāb-e-nazar liye 'zākir'
ghaTā ne khol ke rakkhe the baal mere liye