Tags-Sharab

dil vahāñ khultā hai jis jā ki rahe jām-e-sharāb
daana vaañ ugtā hai jis jā ki tarī rahtī hai

de diyā saaqī ne bhar kar mujh ko bhī jām-e-sharāb
maiñ to kahtā hī rahā paanī mujhe paanī mujhe

samundaroñ kī bhī vus.at jo pyaas se kam ho
hamāre ḳhūn-e-jigar ko sharāb likh denā

nahīñ hai fursat-e-tauba sharāb se 'maz.har'
ki faiz-e-yār se labrez hai ayāġh abhī

kaho ki tuur pe jaltā rahe charāġh abhī
mujhe sharāb se hāsil nahīñ farāġh abhī

chashm-e-mai-gūñ vahāñ sharāb lazīz
dil-e-sozāñ yahāñ kabāb lazīz

mujh tak kab un kī bazm meñ aatā thā daur-e-jām
saaqī ne kuchh milā na diyā ho sharāb meñ

namāz-e-ishq tumhārī qubūl ho jaatī
agar sharāb se tum ai 'ratan' vazū karte

de jis ko sharāb-e-nāb paanī kā mazā
kyā ḳhaak hai is ko zindagānī kā mazā

bah chukī gadrā.e jismoñ kī sharāb
lams-e-avval kā ḳhumār uḌtā huā

hue hī the āmāda tauba pe ham
ki gardish meñ jām-e-sharāb aa gayā

sharāb ham pe hamesha se hai harām 'alīm'
pata nahīñ ye uThī haiñ ghaTā.eñ kis ke liye

bedād mohtasib kī fariyād hai ḳhudā se
barse sharāb ghar ghar mai-ḳhvār kī duā se

shauq-e-mai dil meñ lab pe hijv-e-sharāb
ham pe raushan haiñ sab janāb ke rañg

fasl-e-gul meñ paḌeñ to ḳhuub khileñ
ḳhirqa-e-zohad par sharāb ke rañg

ai sharāb-e-tahūr ke mālik
pyāse logoñ ko saada paanī de

mastī-e-ishq gar tujhe hai 'sirāj'
shīsha-e-chashm siiñ sharāb nikāl

koī aur shai hai vo be-ḳhabar jo sharāb se bhī hai tez-tar
mirā mai-kada kahīñ aur hai mirā ham subū koī aur hai

rahn-e-sharāb-ḳhāna kiyā shaiḳh haif hai
jo pairahan banāyā thā ehrām ke liye

ġham o nashāt kā kitnā hasīn sañgam hai
ki taara aañkh se TuuTā sharāb par Thahrā