Tags-Sharab

muvāfaqat kare kyuuñ mai-kashoñ satī zāhid
idhar sharāb udhar masjid-o-musallā hai

kis tarah piitā 'sājid' sharāb-e-vafā
is meñ kuchh aaj jab zā.iqa na rahā

be piye hī sharāb se nafrat
ye jahālat nahīñ to phir kyā hai

kartā hai sharāb mohtasib band
ye bhī hai koī savāb tauba

pī ham ne bahut sharāb tauba
ai garmī-e-āftāb tauba

gañvā chukā hai tū sāqī-e-hauz-e-kausar ko
ki tere zarf meñ ab tak sharāb-e-nāb nahīñ

miTā diye haiñ sab ehsās uf re zauq-e-sharāb
surūr kam na ho turshī bhī gar milā ke piyūñ

dil ko mahv-e-ġham-e-dildār kiye baiThe haiñ
riñd bante haiñ magar zahr piye baiThe haiñ

ham jān-o-dil ko de chuke mauhūm umiid par
ab ho so ho Dubo de ye kashtī sharāb meñ

shab josh-e-girya thā mujhe yaad sharāb meñ
thā ġharq maiñ tasavvur-e-ātish se aab meñ

saaqī tū chāhe to vo daur bhī aa saktā hai
ki mile jām-e-sharāb us ko jo paanī māñge

chūkī nazar jo zāhid-e-ḳhāna-ḳharāb kī
tauba uḌā ke le ga.ī botal sharāb kī

nigāh-e-dost ne baḳhshī jo dil ko mad-hoshī
sharāb-o-jām se ham ko vo be-ḳhudī na milī

'ġhālib' chhuTī sharāb par ab bhī kabhī kabhī
piitā huuñ roz-e-abr o shab-e-māhtāb meñ

kyuuñ jām-e-sharāb-e-nāb māñgūñ
saaqī kī nazar meñ kyā nahīñ hai

koī is meñ milā gayā paanī
pheñk do ye sharāb paanī meñ

ġhazal ke naam ko badnām kar diyā us ne
kuchh aur de mire saaqī mujhe sharāb na de

piye hue haiñ sharāb-e-sāqī chaḌhī hai mastī-e-pāk-bāzī
vo bāda-kash meñ mudām-e-sāqī jo duḳht-e-raz ko khañgālte haiñ

ghar meñ sāqī-e-mast ke chal ke
aaj sāġhar sharāb kā chhalke

hālat to dekh lī mirī chashm-e-pur-āb kī
saaqī nahīñ havas mujhe jām-e-sharāb kī