Tags-Sharm

aane lagī hai ishq ko ġhairat par apnī sharm
shāyad tirī nigāh ko bezār dekh kar

ham-mashrabī kī sharm gavārā na ho sakī
ḳhud chhoḌ dī hai shaiḳh ko mai-ḳhvār dekh kar

ai dil-e-hijr-zada mujh ko na rusvā karnā
sharm thoḌī sī abhī lahja-e-bebāk meñ hai

un kī hayā o sharm ne rakkhī hai dil kī sharm
kyā hogā jab nigāh milegī nigāh se

sharm-e-jafā se chhupte ho tum dād-ḳhvāh se
uzr-e-gunah tumhārā hai bad-tar gunāh se

zindagī! tujh ko magar sharm nahīñ aatī kyā
kaisī kaisī tirī tasvīr nikal aa.ī hai

ġhash bhī aayā mirī pursish ko qazā bhī aa.ī
be-muravvat tujhe kuchh sharm o hayā bhī aa.ī

had ho chakkī hai sharm-e-shakebā.ī ḳhatm ho
behtar hai ab duā kī pazīrā.ī ḳhatm ho

ye nigāh-e-sharm jhukī jhukī ye jabīn-e-nāz dhuāñ dhuāñ
mire bas kī ab nahīñ dāstāñ mirā kāñptā hai ruvāñ ruvāñ

ye maanā nañg-e-pābandī se kyā āzād ko matlab
magar vo sharm-e-āzādī se bhī āzād hotā hai

guzar hī jā.egī sar se kahīñ to mauj-e-havas
kabhī to sharm use aa.egī mukarte hue

mujāvarān-e-havas tañg haiñ ki yuuñ kaise
baġhair sharm-o-hayā bhī hayā ke saath huuñ maiñ

sharm samjhe tire taġhāful ko
vaah kyā hoshiyār ham bhī haiñ

faqīrī meñ bhī mujh ko māñgne se sharm aatī hai
savālī ho ke mujh se haath phailātā nahīñ jaatā

haa.il hai hijāb-e-sharm-o-hayā dīdār to kyā guftār to kyā
mub.ham haiñ ishāre sab us ke inkār to kyā iqrār to kyā

mohabbat ek pākīza amal hai is liye shāyad
simaT kar sharm saarī ek bose meñ chalī aa.ī

sharam ai bāda-gusāroñ ki bharī mahfil meñ
baḌh ke ḳhud jaam uThā le koī aisā bhī nahīñ

vo bhī ghabrā.e hue thī baat bhī thī sharm kī
rah ga.ī hoñThoñ meñ dab kar hoñTh tak aa.ī huī