Tags-Sharm

ḳhāna-ḳharāb-e-ishq ne kho ke mirī hayā-o-sharm
mujh ko kiyā zalīl aah ḳhāna-ba-ḳhāna kū-ba-kū

ik aise buzurg aaj 'nazīr' aa ga.e piine
mai-ḳhāne se ham sharm ke maare nikal aa.e

tum ko hazār sharm sahī mujh ko laakh zabt
ulfat vo raaz hai ki chhupāyā na jā.egā

ye sharm aur tabassum ye āñkhoñ meñ kājal
adā hai kalī hai ki bachpan hai kyā hai

ye sun ke sharm se koī javāb ban na paḌā
jhukī nigāh-e-jabīñ ho ga.ī araq-ālūd

chhoTā hai sin tumhārā mukhḌā hai pyārā pyārā
phir ho bhalā gavārā sharm-o-hijāb kyuuñ kar

tābūt hī dekhā na mirā aañkh uThā kar
kyā sharm hai kushta huuñ maiñ us sharm o hayā kā

jor-e-sip.har-e-dūñ se burā haal thā bahut
maiñ sharm-e-nā-kasī se zamīñ meñ samā gayā

sharm tā-chand hayā bhī kab tak
muñh se burqe ko judā kījiye bas

sabza ban jā.eñge āḳhir ko chaman ke sab sarv
sharm se terī zamīñ meñ haiñ samāte jaate

āḳhir hijāb-o-sharm kī had bhī hai mehrbāñ
parda ulaT na de mirī āh-e-sahar kahīñ

haif ki be-kasī kī sharm aaj 'jigar' na rah sakī
ujḌe hue mazār par kis ne diyā jalā diyā

yahī chāhe hai jī ki gale se lago zarā mere dahan se dahan to malo
nahīñ ġhurfe se aan ke jhāñk to lo tumheñ apnī hai sharm-o-hayā kī qasam

ḳhaak meñ mil ga.e vale aañkh uThī na sharm se
ham se huā na haq adā us kī nigāh-e-nāz kā

harjā.ī un ko kahte haiñ be-sharm mujh ko log
uThte haiñ rāt-din yahī tūfāñ idhar-udhar

udhar paas chilman ke maujūd the vo idhar the pareshān un ke fidā.ī
rahā sharm-o-shoḳhī kā dilkash tamāshā na jalva dikhāyā na sūrat chhupā.ī

vo aa ke sharm se kahte haiñ merī turbat par
na dekhe sabza-e-ḳhvābīda sar uThā ke mujhe

thī maiñ bhī us pe hañsī mil ke is jahāñ ke saath
ye sun ke sharm se shāyad vo mar gayā hogā