Tags-Sharm

sharm-o-hayā ke parde meñ karte the ham pe jafā.eñ aap
aap ko ham pahchān ga.e muñh āñchal se na chhupā.eñ aap

vāh-jī vā bas dekh liyā kyā vaz.a kī hai yahī pābandī
kahte is ko haiñ sharm-o-hayā ham jaañ se jaa.eñ na aa.eñ aap

tahzīb hī baaqī hai na ab sharm-o-hayā kuchh
kis darja ab insān ye bebāk huā hai

gulābī gaal shafaq seb surḳhī ġhāza kañval
tilism chaah bhañvar naaz sharm narm-garī

qaid aur qaid bhī tanhā.ī kī
sharm rah jaa.e shakebā.ī kī

marne ke ba.ad bhī thī sharm un ko
ki churā.ī mire mazār se aañkh

pa.e-nazr-e-karam tohfa hai sharm-e-nā-rasā.ī kā
ba-ḳhūñ-ġhaltīda-e-sad-rañg da.avā pārsā.ī kā

paanī se sag-gazīda Dare jis tarah 'asad'
Dartā huuñ aa.ine se ki mardum-gazīda huuñ

tumhāre muñh kī safā.ī o āb-dārī dekh
bahā hai sharm se motī ho aab dariyā meñ

ilāhī sharam rakhnā rāz-e-dil kī
kisī kā naam lab par aa rahā hai

sāqī-garī kī sharm karo aaj varna ham
har shab piyā hī karte haiñ mai jis qadar mile

phailā.eñ yā na haath ko phailā.eñ sharm se
dast-e-talab haiñ tere gadā sar se paañv tak

sharm ke kuchh phuul le kar kuchh nadāmat ke guhar
tere parvarda tirī daulat-sarā meñ aa.e haiñ

sharm se dāman-e-sāhil meñ chhupī hai har mauj
tū jo aThkheliyoñ se hai lab-e-dariyā phirtā

kis kis ḳhudā ke sāmne sajda nahīñ kiyā
kuchh sharm kuchh to ābrū-e-zāt chāhiye

vo dariyā hai ye kahne meñ mujhe ab sharm aatī hai
mujhe sairāb kyā kartā vo ḳhud pyāsā nikal aayā

sharm-e-gunah se aab huā garche maiñ vale
dhoī ga.ī na nāma-e-a.amāl kī kitāb

tirī ye zard āñkheñ dekh sharm kar
tū in kā rañg laal kar visāl kar

sharm se tere rū-e-raushan ke
shams bhī zard hai qamar hī nahīñ