Tags-Sharm

dil sharm-e-mohabbat se tar hai tū na pher āñkheñ
kyūñkar pise chakkī meñ bhīgā huā hai daana

tū ne rakh lī gunāhgār kī sharm
kaam aayā na infi.āl apnā

maiñ garebāñ-chāk tārīkī meñ kab tak muñh chhupā.ūñ
ab to sharm aane lagī apnī nadāmat se mujhe

vo merā dost hai saare jahāñ ko hai ma.alūm
daġhā kare vo kisī se to sharm aa.e mujhe

bāhar hai zabt-e-sharm se āshuftagī mirī
tum bhī asīr-e-zulf-e-girah-gīr kar chuke

vasl meñ bekār hai muñh par naqāb
sharm kā āñkhoñ pe pardā chāhiye

jaane thī gurez un ko yā ki sharm mahfil meñ
raat mujh se katrā.e vo nazar milāne se

hai sharm-e-gunah se jaañ kaisī be-tāb
par zikr jahāñ huaa, huā jī hai taab

falak huā mehrbāñ phire din shab-e-visāl aa ga.ī to is ne
bahār-e-lutf-o-karam dikhā kar naqāb-e-sharm-o-hayā uThā kar

sharm sī nazar dil kī hai uThtī nahīñ nigāh-e-shauq
ishq kī manziloñ meñ ik manzil-e-infi.āl hai

ye kārvān-e-umr ye sahrā ye ḳhāmushī
aatī hai sharm ḳhud pe bas ab aur kyā kaheñ

hogā jo e'tibār ta.ammul rahegā kyā
kāmil supurdagī ho to sharm-o-hijāb kyā

sharm hai tarz-e-talāsh-e-intiḳhāb-e-yak-nigāh
iztirāb-e-chashm barpā doḳhta-ġhammāz hai

chhoḌ de aaj sharm kā dāman
ai parī-zād ab nigāh uThā

ab unheñ pahchānte bhī sharm aatī hai hameñ
faḳhr karte the kabhī jin kī mulāqātoñ pe ham

pūchhtā hai haal bhī gar vo to maare sharm ke
ġhuncha-e-tasvīr ke mānind lab khultā nahīñ

ye na.e taur ye andāz mujhe raas nahīñ
merī tahzīb vahī sharm-o-hayā māñge hai

jab aTaktā hai jo dil kuchh nahīñ chhoḌe baaqī
nañg-o-nāmūs hayā aur sharam chāroñ ek

sharm kar sharm ki ai jazba-e-tāsīr-e-vafā
tere hāthoñ vo pashīmān-e-jafā hote haiñ

rakkhī na zindagī ne mirī muflisī kī sharm
chādar banā ke raah meñ phailā ga.ī mujhe