Tags-Sharm

dikhāte nahīñ sharm se rū-e-raushan
koī kāmyābī kī sūrat nahīñ hai

tar sharm ke pasīne se aise hue haiñ raat
malbūs-e-ḳhās dhuup meñ sukhlā.e jaate haiñ

vo taqaddum sharm kā ho yā tajāvuz shauq kā
dāḳhil-e-mustasniyāt-e-laġhzish-e-mastāna thā

uf vo rabt-o-zabt sharm-o-shauq jab bā-hamd-digar
ek jazba mushtarak thā aur bebākāna thā

muñh aap ko dikhā nahīñ saktā hai sharm se
is vāste hai piiTh idhar āftāb kī

koī rakhtā thā agar us se zarā sharm-o-hijāb
ro.ab dikhlāne ko us se kah diyā karte janāb

dosto sun lī ḳhudā ne kal mirī pahlī duā
sharm se āḳhir jhukānī paḌ ga.ī gardan mujhe

hameñ ye sharm ki ham se to bandagī na huī
vo chāhtā hai ki misl-e-ḳhudā nazar aa.e

ai zan-e-nāpāk fitrat-e-paikar-e-makr-o-riyā
dushman-e-mehr-o-vafā ġhārat-gar-e-sharm-o-hayā

sharm se aab hue nīshkar-o-qand-o-nabāt
dekh kar ai shakarīñ-lab tirī shīrīñ-dahnī

kyuuñ na kare dīvāna kisī ko sharm kī aadat husn kī shoḳhī
ho ga.e 'mā.il' dekh ke maa.il uThtā joban jhuktī nazar ham

kaise kahūñ ki kitnā vo khul kar milā hai aaj
sharm-o-hayā ke saare parinde uḌā diye

tujh ko ġhurūr-e-zohd hai sharm-e-gunah mujhe
zāhid kise ḳhabar ki ḳhudā ko ho kyā pasand

āñkheñ vo jhukeñ milte milte rahe hosh-o-ḳhirad jaate jaate
kuchh sharm ne un ko rok liyā kuchh zabt ne ham ko thaam liyā

mujh se ye mahjūbī aur dushman se aisā iḳhtilāt
sharm kiije bevafā.ī meñ na rusvā hojiye

ḳhātma-bil-ḳhair ho jaa.e kahīñ
sharm apnī ab ḳhudā ke haath hai

uTh jaa.e bār-e-sharm to sau fitne ham uThā.eñ
kahtī hai vo nigāh dabe haiñ hayā se ham

sanam ke rū-ba-rū rahnā mujhe ġhanīmat hai
na sharm nañg se kuchh hai mujhe na naam se kaam