Tags-Shohrat

ishq to ruḳhsat huā majnūñ ke saath
kis liye lailā kī shohrat hai yahāñ

maiñ ise shohrat kahūñ yā apnī rusvā.ī kahūñ
mujh se pahle us galī meñ mere afsāne ga.e

shohrat kī aarzū ne kiyā be-vatan hameñ
itnī baḌhī ġharaz ki usūloñ se haT ga.e

ek hī jaise qisse haiñ
shohrat aur rusvā.ī ke

shā.irī kī do sinfeñ haiñ nazm-o-ġhazal
urdu meñ in kī shohrat hai bachcho aTal

ab tū darvāze se apne naam kī taḳhtī utaar
lafz nañge ho ga.e shohrat bhī gaalī ho ga.ī

maazī kī be-nām guphā meñ baiThe baiThe sochte haiñ
nagar-nagar hai shohrat apnī ghar-ghar apnā charchā hai

tārīḳh ke naqshe meñ
jin shahroñ kī shohrat gūñjtī hai

shohrat se terī ḳhush jo bahut hai, ye hai ḳhirad
aur ye jo tujh meñ tujh se ḳhafā hai, ye ishq hai

usī ne rakh diyā mujh ko sameT kar 'haqqī'
vo jis ke naam se mujh ko milī thī shohrat bhī

baiThā thā kahīñ husn-e-numā.ish-gah-e-ġham meñ
ruj.hān zarā shohrat-e-arzāñ kī taraf thā

muft meñ 'alvī' ko shohrat mil ga.ī
aur ham pakḌe ga.e be-kār meñ

aaj bhī shahr meñ hai merī vafā kī shohrat
aa.eñ aur aa ke zarā mere sitamgar dekheñ

us ghar kī badaulat mire sheroñ ko hai shohrat
vo ghar ki jo is shahr meñ badnām bahut hai

gumnāmoñ kī nagrī meñ
shohrat ko tū pāgal likh

chāhte ho agar mile shohrat
roz kī taaza ik ḳhabar rahnā

ajab dekhā karishma lafz kī bāzīgarī kā bhī
suḳhan ma.adūm ho jaatā hai shohrat jaag uThtī hai

ye zauq-e-sher-o-suḳhan fitratan hai ai 'sho.ala'
numūd-o-nām kī ḳhvāhish na fikr-e-shohrat hai

'jauhar' ḳhudā ke fazl se aisī ġhazal kahī
shohrat mushā.ire meñ huī vāh-vāh kī

balā.eñ kitnī bhī aa.eñ sar par 'ra.īs' ġham kī na kiije shohrat
ye āh-o-zārī ye shor-e-mātam koī sunegā to kyā kahegā