Tags-Shohrat

har phuul ke lab par naam mirā charchā hai chaman meñ aam mirā
shohrat kī ye daulat kyā kam hai gar paas nahīñ hai maal to kyā

shohrat bhī milī izzat bhī milī lekin ye 'jamāl'-e-naġhma-sarā
dil-gīr bhī hai barbād bhī hai nāshād bhī hai nākām bhī hai

apnī peshānī pe shohrat kī lakīreñ khīñch le
apne siine se lagā le katba-e-tash.hīr ko

dil qalandar ho to insān sitāroñ se buland
afsarī jāh-o-hasham daulat-o-shohrat kyā hai

raakh ho jaate haiñ kitne hī usūloñ ke charāġh
tab kahīñ jā ke ḳhabar hotī hai shohrat kyā hai

vaqt ḳhud nā-pā.edārī ke liye mash.hūr hai
aise be-taufīq se maiñ ḳhaak shohrat māñgtā

pās-e-nāmūs ne phir ruḳhsat-e-raftan chāhī
shohrat-e-husn vahī ulfat-e-rusvā hai vahī

'farhat' tire naġhmoñ kī vo shohrat hai jahāñ meñ
vallāh tirā rañg-e-suḳhan yaad rahegā

vo junūñ ko baḌhā.e jā.eñge
un kī shohrat hai merī rusvā.ī

terī shohrat ke ḳhaas rañgoñ meñ
ik mire intiḳhāb kā bhī thā

merī qismat meñ haiñ patthar tirī qismat meñ haiñ phuul
apnī shohrat se na andāza-e-rusvā.ī kar

merī shohrat ke pīchhe hai
haath bahut rusvā.ī kā

saudā kabhī ḳhasāre kā us ne kiyā nahīñ
shohrat ḳharīd lī kabhī rusvā.ī beach dī

kahā maiñ tum kuuñ hai rāhat kī sa.ī jalnā jald
ġhamoñ se chhūTnā aur shohrat us se hai matlab

jab kuchh na the ḳhayāl thā nām-o-numūd kā
ab kuchh hue to ḳhvāhish-e-shohrat nahīñ rahī

baḌā bad-ahd hai is shohrat-e-īfā-e-vāda par
agar mash.hūr tū paimāñ-shikan hotā to kyā hotā

merī rusvā.ī-e-jahāñ ke sivā
terī shohrat meñ aur kyā kyā hai

us ke dil kī aag ThanDī paḌ ga.ī
mujh ko shohrat mil ga.ī ilzām se

mujh ko rusvā bhī bahut kartī hai shohrat kī havas
aur shohrat mirā pīchhā bhī nahīñ chhoḌtī hai

ye baat aql meñ bhī samātī nahīñ hai kuchh
shohrat to muft vote dilātī nahīñ hai kuchh