Tags-Shohrat

kho diyā shohrat ne apnī sher-ḳhvānī kā mazā
daad mil jaatī hai 'nātiq' har ratab-yābis ke ba.ad

kaun kahtā hai ki shohrat tire āshiq kī nahīñ
us ko to kūcha-o-bāzār meñ rusvā dekhā

kal gumnāmī kī gahrī khaa.ī meñ bhī gir saktā huuñ
shohrat kī ūñchī choTī par aaj khaḌā huuñ vaise to

tamām mulk meñ us kī ġhazal kī shohrat hai
hamāre shahr meñ ik shaḳhs shād-o-hasrat hai

mujh se ye pūchh rahe haiñ mire ahbāb 'azīz'
kyā milā shahr-e-suḳhan meñ tumheñ shohrat ke sivā

kis ne hamāre naam pe beche haiñ qahqahe
kis ne hamāre naam kī shohrat ḳharāb kī

kaun maslūb huā husn kā kirdār ki ham
shohrat-e-ishq meñ badnām huā yaar ki ham

reḳhta kā ik nayā majzūb hai 'shahpar' rasūl
shohrat us ke naam par ik nañg hai bohtān hai

kuchh to ham ḳhud bhī nahīñ chāhte shohrat apnī
aur kuchh log bhī aisā nahīñ hone dete

dil na huā pahle jo bismil loTne se kyā matlab thā
dhuum thī jab ḳhush-bāshiyoñ kī ab shohrat hai betābī kī

daulat shohrat qatl tabāhī kyā kyā haiñ pahchān na pūchh
aaj vafā ke afsānoñ ke kitne haiñ unvān na pūchh

ek do raat meñ shohrat nahīñ miltī pagle
itne saste meñ ye daulat nahīñ miltī pagle

shohrat ke mol ḳhuub lage shahr meñ magar
ham mohtaram kahāñ the jo kirdār bechte

tujh ko aatā hai nazar bas mirī shohrat kā ḳhayāl
soz-e-dil kī bhī ḳhabar ho to maza aa jaa.e

jab vo bhī pesh na jāvegā aur shohrat hovegī phir to
jis sūrat se ban āvegā tasvīr khiñchā mañgvā.eñge ham

merī rusvā.iyoñ pe na ḳhush ho merī dīvāngī ko duā do
tum ko jitnī bhī shohrat milegī sirf merī badaulat milegī

shohrat us said-e-vafādār kī uḌ jaatī hai
tiir meñ jis ke lagāne ko vo par lete haiñ

shohrat kī be-ḳhudī kā maza aap jāniye
izzat kī zindagī kā maza ham se pūchhiye

vo laḌkī jo nasīb pe rotī thī raat bhar
galiyoñ meñ us ke husn kī shohrat ġhazab kī thī

shohrat huī hai jab se tire sher kī 'valī'
mushtāq tujh suḳhan kā arab tā ajam huā