Tags-Shohrat

chhoḌ kar ghar ko kahīñ jaane se ghar meñ rahne kī ibādat thī baḌī
jhuuT mash.hūr huā raajā kā sach kī sansār meñ shohrat na huī

hamāre shahr kī raunaq hai kuchh mash.hūr logoñ se
magar sab jānte haiñ kaisī shohrat kaun rakhtā hai

koī rusvā.ī hai na shohrat hai
ye mohabbat hai yā karāmat hai

shohrat-e-fan bahut huī daad kamāl de ga.e
sher to dosto magar sāhib-e-hāl de ga.e

umr kitnī bhī ho magar shohrat
baaz aatī kahāñ hai naḳhre se

hai ishq tirā 'fānī' tash.hīr bhī shohrat bhī
rusvā-e-mohabbat yuuñ mash.hūr nahīñ hote

ḳhaak kī shohrat dekh ke ham bhī ḳhaak hue the pal bhar ko
phir to ta.āqub kartī rahī ik umr havā ham logoñ kā

jis ke husn kī shohrat mujh pe baar guzrī thī
aaj phir vahī laḌkī raah roke Thahrī thī

na shohrat hai na rusvā.ī mire pīchhe
magar hai merī tanhā.ī mire pīchhe

terī shohrat ke pas-e-parda mirā naam bhī hai
terī laġhzish se mujhe joḌ diyā jaatā hai

hashr se ishq-e-nihāñ kī aur shohrat ho ga.ī
ek aalam qissa-ḳhvāñ niklā mirī rūdād kā

thoḌī sī shohrat bhī milī hai thoḌī sī badnāmī bhī
merī sīrat meñ ai 'qaisar' ḳhūbī bhī hai ḳhāmī bhī

shohrat hai merī suḳhan-varī kī
hindī meñ hai tarz fārsī kī

shohrat kī aag asl meñ ik naqsh-e-dūd thī
bujh kar bikhar ga.ī tirā huliya bigāḌ ke

thā bolnā to ho ga.e ḳhāmosh ham sabhī
kyā kuchh kiyā hai shohrat o rusvā.ī ke liye

maiñ duniyā kī haqīqat jāntā huuñ
kise miltī hai shohrat jāntā huuñ

be-sutūñ bhī hai vahī aur vahī jū-e-shīr
thā namak shohrat-e-shīrīñ kā so farhād nahīñ

utaar lafzoñ kā ik zaḳhīra ġhazal ko taaza ḳhayāl de de
ḳhud apnī shohrat pe rashk aa.e suḳhan meñ aisā kamāl de de

garmī-e-koshish-e-jafā kab tak
dāvā-e-shohrat-e-vafā kab tak

ik lafz-e-mohabbat ke bane laakh fasāne
tohmat ke bahāne kabhī shohrat ke bahāne