Tags-Shohrat

vo ik uḌaan meñ shohrat kā āsmāñ Thahrā
simaT ke rah ga.e bātoñ ke mard shāḳhoñ par

rusvā.ī ki shohrat kuchh jaano hurmat ki malāmat kuchh samjho
'tābāñ' hoñ kisī unvān sahī hote haiñ mire charche bhī bahut

shefta jab tak na the shohrat thī zabt-o-sabr kī
dard-e-tanhā.ī kī taab ai yār-e-jānī ab kahāñ

jo bhī tum ne shohrat paa.ī jo bhī tum badnām hue
kyā yahī tarka apne pyāre bachchoñ ko de jāoge

ye daulat bhī le lo ye shohrat bhī le lo
bhale chhīn lo mujh se merī javānī

ye daulat bhī le lo ye shohrat bhī le lo
bhale chhīn lo mujh se se merī javānī

ye yug hai kārobārī har shai hai ishtihārī raaja ho yā bhikārī
shohrat hai jis kī jitnī itnā hī martaba ho ye baat to ġhalat hai

nahīñ mile the to shohrat kī bhuuk jaagī thī
jo mil ga.e ho to gumnām honā chāhtā huuñ

jis mulk par thā nāzāñ akbar sā shāh-e-āzam
uḌtā thā āsmāñ par shohrat kā jis kī parcham

kījiye aur savālāt na zaatī mujh se
itnī shohrat bhī sambhālī nahīñ jaatī mujh se

ye atlas o kam-ḳhvāb dikhāte ho abas tum
shā.ir ko nahīñ chāhiye shohrat se ziyāda

jo dekh ke hañstā thā ham jaise faqīroñ ko
shohrat kī bulandī se utrā to bahut royā

shohrat aur izzat ke ziine par chaḌhte fankār
kā saaya zillat ke pātāl meñ utrā jaatā hai

musavvir apne tasavvur kā DhūñDhtā hai davām
na jām-e-jam na visāl-e-sanam na shohrat-o-nām

sivā.e halqa-e-yārāñ meñ apnī shohrat ke
hamārī zaat kā dushman yahāñ kahāñ koī

bad-duā.eñ to ġharīboñ kī nahīñ haiñ tujh par
tū jo shohrat kī bulandī se utar aayā hai

shohrat-e-ām meñ zarrīñ tamġhe the dil kī taskīn
lekin qabr ke katbe par kab darj hue in.aam

ye andher khātā ye kufrān-e-ne.amat zamāne ko ai 'nūh' kyā ho gayā hai
ḳhudā ke karam se to beḌā na Duube magar paa.e shohrat tirī nā-ḳhudā.ī

mujhe kiyā mirī fikr-e-rasā ne āvāra
ki dar-ba-dar mirī shohrat liye phire hai mujhe

kaun maslūb huā husn kā kirdār ki ham
shohrat-e-ishq meñ badnām huā yaar ki ham