Tags-Shokhi

shoḳhī sī hai savāl-e-mukarrar meñ ai kalīm
shart-e-razā ye hai ki taqāzā bhī chhoḌ de

lutf-e-bedād hayā ġhussa taġhāful shoḳhī
rañg kyā kyā na talavvun ne adā ke badle

ahl-e-bīnash ne ba-hairat-kada-e-shoḳhi-e-nāz
jauhar-e-ā.ina ko tūti-e-bismil bāñdhā

terī ho shoḳhī lachar hai terā har andāz poch
saḳht-tar hai sañg-o-āhan se tirī bāhoñ kā loch

minnateñ kartī hai shoḳhī ki manā luuñ tujh ko
jab mire sāmne rūThā huā tū aatā hai

kyuuñ na kare dīvāna kisī ko sharm kī aadat husn kī shoḳhī
ho ga.e 'mā.il' dekh ke maa.il uThtā joban jhuktī nazar ham

timsāl meñ terī hai vo shoḳhī ki ba-sad-zauq
ā.īna ba-andāz-e-gul āġhosh-kushā hai

junūñ navard ko manzar na koī raas aayā
marā to shoḳhi-e-āb-o-havā se laḌte hue

pareshāñ baal karte haiñ unheñ shoḳhī se matlab hai
bikhartā hai agar shīrāza-e-ālam bikhar jaa.e

vo yuuñ bhī māh-e-tal.at haiñ magar shoḳhī qayāmat hai
ki jitne bad-maza hote haiñ ḳhush-tar hote jaate haiñ

phuul ban ke sairoñ meñ aur kaun shāmil thā
shoḳhi-e-sabā se to bāliyāñ nahīñ khultīñ

utar aatā hai vo shoḳhī pe yuuñ bhī mehrbānī kī
mire ik sher kī mohlat ko maah o saal detā hai

ragoñ meñ ḳhuun shoḳhī kar rahā hai
sitāra sī vo peshānī nahīñ hai

mile jo yaar kī shoḳhī se us kī bechainī
tamām raat dil-e-muztarib ko pyaar kiyā

āñkhoñ hī meñ rahe ho dil se nahīñ ga.e ho
hairān huuñ ye shoḳhī aa.ī tumheñ kahāñ se

in bijliyoñ ko rahne de ai shoḳhi-e-nigāh
shāyad ḳhabar nahīñ hai tujhe jal gayā huuñ maiñ