Tags-Shokhi

tasvīr maiñ ne māñgī thī shoḳhī to dekhiye
ik phuul us ne bhej diyā hai gulāb kā

ḳhudī kī shoḳhī o tundī meñ kibr-o-nāz nahīñ
jo naaz ho bhī to be-lazzat-e-niyāz nahīñ

ḳhud ishq kī gustāḳhī sab tujh ko sikhā degī
ai husn-e-hayā-parvar shoḳhī bhī sharārat bhī

shoḳhī se vo mānā-e-sitam pūchh rahe haiñ
ab lafz-e-jafā bhī unheñ goyā nahīñ aatā

saath shoḳhī ke kuchh hijāb bhī hai
is adā kā kahīñ javāb bhī hai

jo un se pūchho to un ke ḳhilāf hai shoḳhī
jo ham se pūchho to ham ko hai nāgavār lihāz

jab dekhte haiñ gul ko kahte haiñ vo shoḳhī se
rotī huī sūrat hai ḳhandāñ kise kahte haiñ

batāo dil duuñ na duuñ kaho to ajiib nāzuk mo.āmla hai
idhar to dekho nazar milāo ye kis kī shoḳhī machal rahī hai

jo koī pūchhe jān-e-man shoḳhī o jalva kis tarah
lama-e-barq kī tarah ek jhamak dikhā ki yuuñ

hoñT par diyā rakhnā dil-jaloñ kī shoḳhī hai
varna is andhere meñ kaun muskurā paayā

raftār mo.ajaza hai to hai sehr chaal meñ
shoḳhī ajab tarah kī tire naqsh-e-pā meñ hai

pūchhtā maiñ bhī mizāj aap kā shoḳhī se yūñhī
choT dil kī jo kahīñ aap ne khaa.ī hotī

yaañ nafas kī shoḳhī se hai majnūñ lailā
qaane hai to mat bahr-e-nafī kahnā lā

mujhe dīvāna kar detī hai apnī maut kī shoḳhī
koī mujh meñ rag-e-iz.hār kī sūrat phaḌaktā hai

fitna-gar shoḳhī-e-hayā kab tak
dekhnā aur na dekhnā kab tak

faqat nigāh se hotā hai faisla dil kā
na ho nigāh meñ shoḳhī to dilbarī kyā hai

shoḳhī se har shagūfe ke TukḌe uḌā diye
jis ġhunche par nigāh paḌī dil banā diyā

churātā hai vo pahle niiñd phir shoḳhī se kahtā hai
ye shab bhar jāgte rahte ho soyā kyuuñ nahīñ karte

vasl kī shab chār-dam chhalle bhī un ke saath haiñ
ya.anī shoḳhī hai sharārat hai hayā hai naaz hai

shab ko baġhal meñ thā bhī to vo dilsitāñ na thā
shoḳhī ye kah rahī thī ki yaañ thā vahāñ na thā