Tags-Subah

phuul paanī par khilā mirī maujūdgī kā
saltanat sub.h-e-bahārāñ kī

lag ke soī hai koī raat mire siine se
subah ho jaa.e ki jazbāt pe qaabū aa.e

jhilmilātā hai subah kā taarā
ab to jiine kā aasrā bhī nahīñ

ġham aur ḳhushī donoñ har roz ke mehmāñ haiñ
ye sub.h-ba-sub.h aa.ī vo shām-ba-shām aayā

dil ulajhtā rahā tā-sub.h hamārā shab ko
paḌ gayā us ke jo phūloñ ke zarā haar meñ bal

maġhrūr bahut the ham aañsū kī sarāyat par
so sub.h ke hone ko tāsīr nazar aa.ī

vo dil apnā bahlāte haiñ is shām-o-sahar ke khel meñ ham
har sub.h dabāte haiñ jazbe har shaam vo fitna karte haiñ

bhiig jaatī hai ye ma.asūm sī dhartī har sub.h
kaun rotā hai batāo to ghaTā ke us paar

ye muḳhtasar sī hai rūdād-e-sub.h-e-mai-ḳhana
zamīñ pe Dher thā TuuTe hue piyāloñ kā

tum hisār-e-vaqt meñ sūraj bane baiThe rahe
aur gardish ke liye ḳhud sub.h o shaam aate rahe

gardish-e-mehr-o-māh bhī gardish-e-jām ban ga.ī
sub.h na laḌkhaḌā.e kyuuñ shaam na jhuum jaa.e kyuuñ

tamām raat nayā but tarāshte guzrī
huī jo sub.h to us but ko TūTtā paayā

aaj tak sub.h-e-azal se vahī sannāTā hai
ishq kā ghar kabhī sharminda-e-mehmāñ na huā

havā-e-sub.h-e-numū dushman-e-chaman kaise
shikār-e-rashk-o-raqābat gul-o-saman kaise

jo sub.h ne bañsarī bajā.e havā.eñ karvaT badal rahī haiñ
vasī.a dariyā kī halkī maujeñ taḌap rahī haiñ uchhal rahī haiñ

qalam se kātib ye likh rahā hai dalīl-e-sub.h-e-bahār ho tum
dalīl kī daal ko badal kar vo zaal kar de to kyā karoge

vahī sub.h o shaam ke marhale vahī ḳhaal o aab ke silsile
vahī qisse nān-o-namak ke haiñ vahī jhagḌe māl-o-manāl ke

ye ruḳh-e-yār nahīñ zulf-e-pareshāñ ke tale
hai nihāñ sub.h-e-vatan shām-e-ġharībāñ ke tale

yaqīn-e-sub.h-e-chaman hai kitnā shu.ūr-e-abr-e-bahār kyā hai
savāl karte haiñ dasht-o-dariyā ki qāfile kā vaqār kyā hai

ai mere dil ke chain mire dil kī raushnī
aa aur sub.h kar de shab-e-intizār kī