Tags-Subah

mahīnoñ ho ga.e dekhī nahīñ hai sub.h-e-ummīd
kise ḳhabar ye musībat kī raat kitnī hai

har sub.h pe saaya sā hai kuchh talḳhī-e-shab kā
har shaam ko andesha-e-fardā hai koī aur

mujh ko is zulmat-e-shab-zār se nisbat hī kyā
merī bedār nazar sub.h ke āsār pe hai

sub.h kī aaj jo rañgat hai vo pahle to na thī
kyā ḳhabar aaj ḳhirāmāñ sar-e-gulzār hai kaun

os meñ bhīge shahr se bāhar aate din se milnā hai
sub.h-talak sansār rahe to ham ko jald jagā denā

ham ko ai qāfila-e-shauq ye kyā yaad rahe
ki huī sub.h kahāñ aur kahāñ raat huī

saaz ke maujoñ pe naġhmoñ kī savārī maiñ thī
bhairvī ban ke lab-e-sub.h pe jaarī maiñ thī

raat ye kaun mire ḳhvāb meñ aayā huā thā
sub.h meñ vādi-e-shādāb meñ aayā huā thā

yaqīñ hai sub.h-e-qayāmat ko bhī subuhuhī-kash
uTheñge ḳhvāb se saaqī subū subū karte

terī is sub.h binā gosh-o-ḳhat-e-mushkīñ suuñ
sair kartā huuñ ajab shām-o-sahar shām-o-sahar

raat paḌe ghar jaanā hai
sub.h talak mar jaanā hai

har sub.h hai ye ḳhidmat ḳhurshīd-e-pur-ziyā kī
kirnoñ se gūñdhtā hai choTī himāliyā kī

aur bhī ho ga.e vo ġhāfil-e-ḳhvāb
nāla-e-sub.h-e-nā-rasā na rahā

sub.h ne phir mire zaḳhmoñ se ujālā māñgā
ek zaḳhm aur mire naam tirī umr darāz

yaad kisī kī aa ga.ī kaT ga.ī zindagī kī raat
varna kahāñ numūd-e-sub.h aisī shab-e-darāz meñ

sub.h-e-azal hai sub.h-e-husn shām-e-abad hai dāġh-e-ishq
dil hai maqām-e-irtibāt silsila-e-darāz meñ

bhulā chukī dil se shām-e-ġhurbat har ek naqsha har ek sūrat
hamārī āñkhoñ meñ lekin ab tak faroġh-e-sub.h-e-vatan hai baaqī

hijr kī shab meñ qaid kare yā sub.h-e-visāl meñ rakkhe
achchhā maulā terī marzī to jis haal meñ rakkhe

tārīk raat pichhle pahar tak thī sho.ala-bār
ai sub.h-e-nau muaaf ki jaagā huuñ der se

na pyāre uupar uupar maal har sub.h-o-masā chakhkho
hamāre paas bhī ik raat to so kar mazā chakhkho